Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

SQO-nyń turaqtandyrý qorynda 5 myńǵa tonnaǵa jýyq azyq-túlik bar

2022 jyldyń 29 qańtar 2022 13:50

PETROPAVL. QazAqparat – Soltústik Qazaqstan oblysynda turaqtandyrý qoryndaǵy azyq-túlik kúnnen-kúnge ósken baǵaǵa áser etý úshin Petropavldyń barlyq bazarynda jáne iri saýda oryndarynda satylyp jatyr. Baǵa naryqtaǵydan anaǵurlym tómen, dep habarlaıdy QazAqparat tilshisi.

Osydan tórt jyl buryn Petropavlda 12 aı boıy ónimdi buzbaı saqtaýǵa múmkindik beretin kókónis qoımasy paıdalanýǵa berildi. Maqsat – ásirese kóktem ýaqytynda óńirdegi kókónis tapshylyǵyn joıyp, syrttan qymbat jemis-jıdektiń ákelinýine jol bermeý edi. Zamanaýı nysan búginde óz mindetin oryndap jatyr. Kókónis qoımasy, klımattyq bes saqtaý kamerasymen jabdyqtalǵan. Ár kamerada belgili bir ónim túri saqtalady. Mamandardyń aıtýynsha, ondaǵy biregeı mıkroklımat kókónisti uzaq saqtaýǵa múmkindik beredi.

«Máselen ekinshi kamerada qyryqqabat saqtalǵan, ondaǵy temperatýra 0 gradýs. Saqtaý tehnologııasy durys bolǵan jaǵdaıda ónim mamyr aıynyń sońyna deıin búlinbeıdi. Úshinshi kamerada kartop saqtalǵan, munda +3 gradýs, ıaǵnı árqaısysyna jaıly orta qalyptastyramyz.

Apta saıyn ozondaımyz, ol jaǵymsyz ıisti, mıkrobtardy joıý úshin atqarylady. Kartop bolsyn, qyryqqabatty alsaq ta ol demalady, qazir «qalyń uıqyda» bolǵanymen «demalyp jatyr». Sondyqtan gaz bóledi, al ol búlinýge ákeledi.

Budan bólek ónimdi saýdaǵa shyǵarmas buryn suryptaımyz. Saýda oryndaryna taza, sapaly ónim ǵana jiberiledi», - deıdi kókónis qoımasynyń aǵa menedjeri Maksım Vanıýshın.

SQO-nyń turaqtandyrý qoryna alynǵan kókónis osy qoımada saqtalǵan.

«Bıyl osy maqsatty 1300 tonna kartop, 250 tonna qyryqqabat, 200 tonna sábiz, 300 tonna pııaz, 1500 tonna un, 680 tonna qant jáne 524 tonna suıyq maı satyp aldyq. Budan basqa kúrish pen qaraqumyq bar. Bul ónimniń ishinde kókónister mamandandyrylǵan qoımada saqtaýly.

Ónim jergilikti taýar óndirýshilerden tómen baǵaǵa satyp alynady. Áleýmettik mańyzy bar azyq-túlikti satýǵa arnalǵan ózimizdiń alty dúkenimiz bar, olar Petropavldaǵy ár bazarda jáne úlken saýda ortalyqtarynda ornalasqan. Baǵa, árıne, naryqtaǵydan arzan. Turaqtandyrý qorynda ónim jetkilikti, kúzde jańa ónim satyp alamyz», - deıdi «Soltústik» áleýmettik-kásipkerlik korporatsııasy AQ basqarma tóraǵasynyń orynbasary Ǵamalı Jumashov.

Turaqtandyrý qorynyń ónimine suranys joǵary, ol túsinikti de. Máselen, kartoptyń kelisi – 115 teńge, pııaz, sábiz, qyryqqabat 95 teńge turady. Mundaı baǵa qala dúkenderinde joq.


Joǵary qaraı