Aýa raıy
Astana 8 °S
Almaty 15 °S
valıýta baǵamy
USD 421.58
EUR 496.83
RUB 5.53
CNY 62.20

SQO-ǵa qaıyrymdylyq kómek retinde 4 jedel járdem kóligi jetkizildi

2020 jyldyń 18 qyrkúıek 2020 12:19

PETROPAVL. QazAqparat – Soltústik Qazaqstan oblysynyń emdeý mekemelerine COVID-19-dyń ekinshi tolqynymen kúreske daıyndyq aıasynda qaıyrymdylyq kómek retinde qondyrǵylar men jedel járdem kólikteri jetkizildi, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, oblystyń emdeý mekemelerine Chevrolet Damas markali 4 jedel járdem kóligi jetkizildi. Budan bólek 3 ókpeni jasandy jeldetý apparatyn, 5 ottegi kontsentratoryn jáne 50 pýlsoksımetrdi gýmanıtarlyq kómek retinde aldy.

«Bul kómek QR Densaýlyq saqtaý mınıstrligi men «Samuryq-Qazyna» AQ arasyndaǵy ózara yntymaqtastyq Memorandýmy aıasynda jasaldy. Ulttyq ál-aýqat qorynyń qaıyrymdylyq tobynyń biryńǵaı operatory - «Samruk-Kazyna Trust» áleýmettik jobalardy damytý qory qajetti qondyrǵylardy satyp alyp, olardy bizge berip jiberdi», - deıdi SQO densaýlyq saqtaý basqarmasy basshysynyń orynbasary Nurlan Aımanov.

Mundaı qaıyrymdylyq kómek elimizdiń barlyq oblystaryna, sondaı-aq, respýblıkalyq mańyzy bar qalalaryna kórsetilmek.

«Bul is-shara túrli juqpaly aýrýlarmen, sonyń ishinde COVID-19 ınfektsııasymen kúreste bizdiń medıtsınamyzdyń daıyndyq deńgeıin arttyrý maqsatynda qolǵa alyndy. Osylaısha ulttyq densaýlyq saqtaý júıesin nyǵaıtýǵa kómektespekshimiz», - deıdi «Samruk-Kazyna Trust» qorynyń resmı ókili Mıras Іrgebaev.

Memorandým aıasynda elimizdiń emdeý mekemelerine 100 jedel járdem kóligi, 1 myń ottegi kontsentratory, 50 ókpeni jasandy jeldetý apparaty jáne 1 myń pýlsoksımetr jetkizilmek.

Jalpy sáýir aıynan SQO-ǵa AQSh, BAÁ, Serbııa, Qytaı, Túrkııa, Sıntszıan-Uıǵyr avtonomdy aýdanynan, Japonııa, Katar, Dýbaı, Reseı, Izraıl, Grýzııa, Ózbekstan elderinen jáne dúnıejúzilik densaýlyq saqtaý uıymynan gýmanıtarlyq kómek keldi. Onyń ishinde jeke qorǵanysh kostıýmderi, medıtsınalyq maskalar, medıtsınalyq qondyrǵylar bar. Onyń barlyǵy óńirdiń emdeý mekemelerine bólinip berildi.


Joǵary qaraı