Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-daǵy iri kombınat óz jumysshysynyń otbasyndaǵy dúnıege kelgen ár balaǵa qomaqty qarajat tóleıdi

2021 jyldyń 4 jeltoqsan 2021 15:13

PETROPAVL. QazAqparat – Soltústik Qazaqstan oblysyndaǵy elimizdiń eń iri Obýhov ken-baıytý kombınaty óz jumysshylaryna turaqty áleýmettik qoldaý kórsetýdi jolǵa qoıǵan. Sonyń biri kásiporyn óz júmysshylarynyń otbasynda dúnıege kelgen árbir balaǵa qomaqty qarajat tólep keledi, dep habarlaıdy QazAqparat.

Obýhov ken-baıytý kombınatynyń jumysshysy Beıbit Isabaev osy kásiporynda úsh jyldan beri jumys isteıdi eken. Onyń jaqynda ǵana áke atanyp, dúnıege úshinshi sábıi kelgen. Otbasynyń osynaý qýanyshyna Obýhov ken-baıytý kombınaty úlken qoldaý kórsetip, úsh mıllıon teńge qarjylyq kómek aýdarǵan eken. «Ótken aıda qyzym dúnıege keldi. Kompanııanyń bizdiń otbasymyzǵa osyndaı qomaqty qarajat aýdaryp, kómek kórsetýi qýanyshymyzdy eseledi. Men bul úshin alǵysym sheksiz», – deıdi B. Isabaev.

Aıta keterligi, «Tıolaın» seriktestigine qaraıtyn, jylyna eki myń tonnadan astam kontsentrat óndiretin Obýhov ken-baıytý kombınaty ózin áleýmettik jaýapkershiligi joǵary mekeme retinde tanytýda. Kompanııa aımaq halqynyń kópshiligin turaqty jumyspen de qamtyǵan. Sonymen qosa, jumysshy otbasyndaǵy dúnıege kelgen árbir sábıge qatysty kórsetiletin bundaı qarjylyq qoldaý kombınatta jarty jyldan asa jumys istegen qyzmetkerdiń bárine de jasalady eken. Eń mańyzdysy, bunda árbir balaǵa jeke, máselen otbasyndaǵy tuńǵyshy dúnıege kelse mıllıon teńge, ekinshi balaǵa – eki mıllıon, al úshinshi balaǵa – úsh mıllıon teńge beriledi.

Kombınat basshylyǵy bundaı qarjylyq qoldaý Qazaqstandaǵy bala týý sanyn kóterý maqsatynda qarastyrylyp otyrǵanyn alǵa tartady. Bul ǵana emes, kásiporyn aldaǵy ýaqytta óz qyzmetkerleriniń balalaryna arnap balabaqsha ashyp, eń jaqsy tárbıeshilerdi soǵan tartpaqshy. Al ken ornynda qazirgi kúni 230 adam jumys istese, onyń barlyǵy jergilikti turǵyndar.

«Bizde beskúndik jumys bekitilgen, senbi, jeksenbi demalamyz. Vahta boıynsha isteıtin jumysshylar da bar. Aılyǵymyzdy ýaqytyly alyp otyrmyz, syıaqy da beriledi. Jalpy osy kásiporynnyń arqasynda jaǵdaıymyz jaqsy», – deıdi kombınattaǵy zertteýshi–laborant Gúlmıra Abdýllaeva.

Mekemeniń deregine qaraǵanda qyzmetkerlerdiń ortasha jalaqysy 400 myń teńge. Áıtse de aılyq jalaqy ken ornyndaǵy kontsentrat óndirisiniń kórsetkishine baılanysty bolyp tabylady. Jospar boıynsha ujym jylyna 2200 tonna tsırkondy kontsentrat óndirýi kerek. Bul ónim elektronıka, avıatehnıka óndirisine paıdalanylady. Seriktestik ózderi óndirgen ónimdi tolyqtaı eksporttaıdy, óıtkeni, elimizde kontsentratty óńdeıtin zaýyt joq. Sonymen qatar, kásiporynnyń ózekti máselesiniń biri bilikti kadr jetispeýshiligi. Osyǵan basa nazar aýdarylyp keledi.

«Biz qyzmetkerlerdiń oqýyna ózimiz qarjy quıamyz. Qaziz onshaqty adam oqyp jatyr, arasynda jastar, aýyl turǵyndary bar. Máselen, bizdiń qoldaýymyzben byltyr birqatar jastar ýnıversıtet bitirse, birqatary kolledjge tústi. Biz sondaı aq, olardyń magıstratýra men doktorantýrada bilimin jalǵastyrýyna qoldaý jasaıtyn bolamyz», – deıdi seriktestiktiń atqarýshy dırektory Tórehan Almasbaev.

Jalpy seriktestik óz qyzmetkerlerine kómektesip qana qoımaı, qaıyrymdylyq aktsııalaryna da belsene qatysady. Mysaly, kásiporynnyń qoldaýy arqasynda sońǵy birneshe jylda bes otbasy baspanaly boldy. Baspanamen qamtylǵan bir otbasy kombınatqa jumysqa da turǵan.


Joǵary qaraı