Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da jeńil kólik pen jylqy soqtyǵysyp, eki adam zardap shekti

2021 jyldyń 26 qarasha 2021 17:45

PETROPAVL. QazAqparat – Soltústik Qazaqstan oblysynda jeńil kólik jolǵa shyǵyp ketken jylqylarmen soqtyǵysyp, eki adam aýyr jaraqat aldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 26 qarashaǵa qaraǵan túni saǵat 00.30 shamasynda Taıynsha aýdanynyń polıtsııa bólimine jol-kólik oqıǵasy týraly telefon habarlamasy túsken. Jolda kele jatqan «VAZ-2115» avtokóliginiń aldynan kenetten birneshe jylqy atyp shyqqan. Qulyndy bıe qatty soqqydan sol jerde óldi.

Mashınada jergilikti kásiporyndarda jumys isteıtin eki adam bolǵan, olar úılerine qaıtyp bara jatyr eken. Júrgizýshi de, onyń jolaýshysy da aýyr jaraqat aldy. Ekeýi de aýdandyq aýrýhananyń hırýrgııa bólimine jatqyzyldy.

Polıtseılerdiń aıtýynsha, jolǵa jaqyn mańda jylqylar baǵylyp júrgen. Birneshe jylqy bólinip, jolǵa shyǵyp ketken. Jylqyshyǵa qatysty mal jaıý jáne jol qozǵalysy erejelerin buzǵany úshin ákimshilik hattamalar toltyryldy.




«Mundaı oqıǵalardyń aldyn alý úshin polıtseıler únemi tıisti jumystardy júrgizedi. Sondaı-aq, júrgizýshilerge de qys mezgilinde kólikti basqarýdyń qıyndaıtynyn esterine salamyz. Sondyqtan, ásirese, túnde jáne eldi mekenderdiń mańynan ótkende abaı bolyp, jyldamdyqty tómendetý qajet», - deıdi aýdandyq polıtsııa bólimi bastyǵynyń mindetin atqarýshy Arǵyn Amanbaev.

Jyl basynan beri SQO boıynsha maldy ıesiz jiberýge qatysty 2,5 myńnan astam fakti tirkeldi. Arnaıy turaqtarǵa 8,5 myńǵa jýyq qańǵyrǵan mal ıeleri anyqtalǵanǵa deıin ornalastyryldy.








Joǵary qaraı