Aýa raıy
Astana 12 °S
Almaty 14 °S
valıýta baǵamy
USD 412.55
EUR 468.66
RUB 5.79
CNY 58.80

SQO-da jańa oqý jylynda jańa eki mektep paıdalanýǵa beriledi

2020 jyldyń 12 tamyz 2020 12:38

PETROPAVL. QazAqparat – Soltústik Qazaqstan oblysynda bıyl 107 mektep kúrdeli jóndeýden ótti. Qyrkúıekte óńirde jańa eki mektep ashylady, dep habarlaıdy «QazAqparat» HAA tilshisi.

Búgin SQO ákimi Qumar Aqsaqalov brıfıng ótkizip, jańa oqý jylyna daıyndyq barysy jaıynda baıandady.

Óńir basshysynyń aıtýynsha, mektepterdiń materıaldyq-tehnıkalyq bazasy jańartylyp jatyr. Ótken jyly 142 mektep kúrdeli jóndelse, bıyl olardyń qataryna taǵy 107-si qosylmaq. Osylaısha, eki jyl ishinde óńir mektepteriniń jartysy jańartylmaq. Budan basqa oblysta úsh mektep salynyp jatyr. Jańa oqý jylynda «Jas órken» yqsham aýdanynda 900 oryndyq jáne Beskólde 300 oryndyq zamanaýı eki mektep ashylady.

Búkil mektepter beınebaqylaýmen qamtamasyz etildi. 43 mektepke avtobýs, 231 mektepke jıhaz jáne 324 mektepke sport quraldary alyndy.

«Sońǵy úsh jylda 1 600 kompıýter satyp alyndy. Bıyl karantın kezinde únemdeý esebinen 580 kompıýter alynyp, oqýshylarǵa taratyldy. Oǵan qosa taǵy 14 myń tehnıka - noýtbýk, kompıýter jáne planshet jetkiziledi. Bıyl alynatyn tehnıka sońǵy 10 jyldaǵy kompıýter sanymen teń», - dedi oblys ákimi.

Jalpy SQO-da 477 mektepte 75 myń bala bilim alady. Jyl sanap oqýshylardyń sany ósip keledi. 2018 jyly 7,7 myń bala birinshi synypqa barsa, byltyr 8,5 myń oqýshy mektep tabaldyryǵyn attady. Bıyl birinshi synypqa 9 myńǵa jýyq bala keledi.

«Aýyldardaǵy 318 shaǵyn mektepte oqý qalypty rejımde ótedi. Bir synypta 15 baladan aspaýy tıis, eki aýysymda oqıdy. Qashyqtan oqytatyn mektepterdegi bastaýysh synyptarda ata-analardyń ótinishi boıynsha 2 myń kezekshi top ashylady. Barlyq balalarǵa tegin oqýlyq beriledi . Tıisti qarjy bólindi. Balalarǵa satyp alynǵan 15 myńǵa jýyq kompıýter taratylady. Birinshi kezekte tehnıka tabysy tómen otbasylardyń balalaryna, jetimderge jáne erekshe balalarǵa beriledi. Sondaı-aq, 373 muǵalim kompıýterlerdi ýaqytsha paıdalanýǵa alady», - dedi Qumar Aqsaqalov.

SQO-da búginde 635 eldi meken bolsa, onyń 437-sinde keń jolaqty ınternet bar. Bıyl taǵy 133 aýyl ınternetke qosylady. Osylaısha jyl sońyna deıin barlyq aýyldardyń 90 paıyzy keń jolaqty ınternetpen qamtamasyz etilmek.

«Sensor termometr, sanıtaızer men dezınfektsııa quralynyń qajetti kólemi alynyp jatyr. Mektep ashanalary ýaqytsha jumys istemeıdi. 1 qyrkúıektegi Bilim kúni 1-11 synyp oqýshylary úshin qashyqtan ótedi», - dedi óńir basshysy.


Joǵary qaraı