Aýa raıy
Astana 19 °S
Almaty 19 °S
valıýta baǵamy
USD 412.55
EUR 468.66
RUB 5.79
CNY 58.80

SQO-da tórt kúnde 35 mas júrgizýshi ustaldy

2019 jyldyń 11 qarasha 2019 22:08

PETROPAVL. QazAqparat – Soltústik Qazaqstan oblysynda «Mas júrgizýshi» jedel-aldyn alý is-sharasy ótip, tórt kúnde 35 adam jaýapqa tartyldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, profılaktıkalyq-aldyn alý sharasy 7-11 qarasha aralyǵynda ótti. Oǵan 350-den astam patrýldik jáne ýchaskelik polıtsııa ınspektory jumyldyryldy. Jol qaýipsizdigin qamtamasyz etýge 102 avtopatrýl tartyldy. Reıdter tek eldi mekenderde ǵana emes, sondaı-aq qala syrtyndaǵy joldarda júrgizildi.

SQO PD Jergilikti polıtsııa qyzmeti basqarmasynyń bastyǵy Aıdyn Baımatovtyń aıtýynsha, sharanyń maqsaty - júrgizýshiler arasynda tártip ornatyp, jol kólik oqıǵalarynyń aldyn alý, sonymen qatar júrgizýshilerdiń kólikke mas kúıinde otyrýyna jol bermeý. Bıylǵy 10 aı ishinde oblysta 1133 adam kólikti mas kúıde júrgizgeni úshin ustaldy.

Nátıjesinde, tórt kúni ishinde jolda júrý erejelerin buzýdyń 1821 deregi anyqtaldy. Kólikti mas kúıinde basqarǵan 35 júrgizýshi ustaldy. Jyldamdyqty asyrǵan - 171, kóligi tehnıkalyq baıqaýdan ótpegen - 51 jáne manevr erejelerin buzǵan 40 júrgizýshi jaýapkershilikke tartyldy. Eń kóp quqyqbuzýshylyq - 250 fakti qaýipsizdik beldigin taqpaý boıynsha tirkelgen.

Reıdke shyqqan patrýldik polıtsııa qyzmetkerleri, sonymen qatar qysqy shınalarǵa ýaqtyly aýysý qajettigin eskertip, jyldamdyqty qatań saqtaýǵa keńes berdi.

Oblystyq jedel-profılaktıkalyq is-sharasy aıaqtaldy. Alaıda jol qozǵalysy erejelerin buzýshylardy anyqtaýǵa baǵyttalǵan jumys óz jalǵasyn tabady.

Joǵary qaraı