Aýa raıy
Astana -17 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da sport mektebiniń býhgalteri 24 mln jýyq teńgeni qaltasyna basqan

2020 jyldyń 29 qazan 2020 14:51

PETROPAVL. QazAqparat – Petropavl qalalyq soty Bokstan olımpıada rezerviniń oblystyq balalar-jasóspirimder sport mektebiniń bas býhgalterine qatysty qylmystyq isti qarap, úkim shyǵardy, dep habarlaıdy QazAqparat tilshisi.

Petropavl qalalyq sotynyń málimetinshe, Bokstan olımpıada rezerviniń oblystyq balalar-jasóspirimder sport mektebiniń 54 jastaǵy bas býhgalteri alaıaqtyq jasaǵan. Ol ózine senip tapsyrylǵan qarjyny qyzmettik ókilettigin paıdalana otyryp asa iri kólemde urlaǵan.

Sottalǵan 2017 jyldyń maýsymy men 2020 jyldyń aqpany aralyǵynda tólem qalyptastyrýdyń elektrondy baǵdarlamasyna jalǵan málimet engizip kelgen. Osylaısha ózine eńbekaqyny, demalysaqyny, saýyqtyrý járdemaqysyn, kótermeaqy, taǵy basqa tólemderdi zańsyz jazǵan. Naqty málimetterdi ádeıi burmalap, aqshany óziniń kartochka shotyna aýdaryp otyrǵan.

Saldarynan «Bokstan olımpıada rezerviniń oblystyq balalar-jasóspirimder sport mektebi» KMM-ge jáne «SQO ákimdiginiń dene shynyqtyrý jáne sport basqarmasy» KMM-ine 23 781 833 teńge shyǵyn keldi. Bul qarajatty eks-bas býhgalter óz maqsatyna jumsaǵan.

Sotqa deıingi tergeý barysynda bas býhgalter óz kinásin moıyndady. Kýágerler suralyp, sot saraptamalary jasaldy.

Petropavl qalalyq soty 28 qazan kúni ony qylmystyq iste kináli dep taýyp, 6 jyl 8 aıǵa bas bostandyǵynan aıyrdy. Sottalýshy jazasyn qylmystyq-atqarý júıesiniń ortasha deńgeıdegi qaýipsizdik mekemesinde óteıdi.

Úkim zańdy kúshine engen joq.


Joǵary qaraı