Aýa raıy
Astana -9 °S
Almaty -8 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da oqýshylar úıde otyryp mektepte fýtbol oınaı alady

2020 jyldyń 20 qarasha 2020 00:52

PETROPAVL. QazAqparat – Petropavlda mektep oqýshylary óz mektepteriniń vırtýaldy dál kóshirmesin jasap shyqty. Osylaısha olar bilim ordasyna jańadan qabyldanǵan, alaıda karantınniń saldarynan úıde oqýǵa májbúr izbasarlaryna nysandy tanystyrdy, dep habarlaıdy QazAqparat tilshisi.



Bul - Petropavldaǵy Nazarbaev Zııatkerlik mektebiniń joǵary synyp oqýshylarynyń jobasy. Olar ózderi oqıtyn mekteptiń «qurylysyna» eki aı jumsaǵan. Sol úshin Minecraft platformasyn qoldanǵan.

«Jobany birneshe adam birigip jasadyq. Árqaısymyzdyń óz mindetimiz boldy. Men serverdiń teńgerimine jaýap berdim. Nátıjesi oıdaǵydaı boldy. Bul vırtýaldy mektep arqyly bizdiń shynaıy mekteppen tanysýǵa bolady. Óıtkeni barlyǵy asqan dáldikpen jasalǵan. Munda sport alańyna deıin bar. Ár bala úıindegi kompıýter arqyly qosylyp, fýtbol, voleıbol sııaqty oıyndardy birge oınaı alady», - deıdi 10 synyp oqýshysy Arlan Muhamedjanov.

Petropavldaǵy Nazarbaev zııatkerlik mektebi 720 orynǵa shaqtalǵan. Aýdany 15 myń sharshy metr. Oqý blogynda ǵana 60-tan astam kabınet bar. Balalardyń nazarynan olardyń eshqaısysy tys qalmady, tipti ǵımarattaǵy jıhazdar da qaz-qalpynda berilgen.




«Mektep bıyl 7-synypqa 140 oqýshyny qabyldady. Alaıda karantınge baılanysty bul balalar mekteppen tanysa almady. Sondyqtan Minecraft platformasynda bilim ordasynyń vırtýaldy nusqasyn jasap shyǵardyq. Ońaı bolǵan joq. Matematıkalyq jáne oılaý qabiletin qajet etedi, damytady. Bárinen de ǵımarattyń irgetasyn qalaý qıynǵa tústi. Kompıýterde ár kirpishti óz ornymen qalaý kerek. Avtorlar mekteptiń ishine kóp ýaqyt jumsady. Balalarǵa bul oıyn jaqsy tanys. Men olardyń bergen qarapaıym tapsyrmalaryn oryndap, qolǵabys ettim», - deıdi mektep dırektory Danııar Ýálıev.

Vırtýaldy mekteptiń alǵashqy qonaqtary 7-synyp oqýshylary boldy. Olar saıahat jasap, kvest oıynyna qatysty.

Búginde oqýshylar SQO-daǵy kıeli jerlerdiń vırtýaldy kóshirmesin jasaýǵa kirisken. Qazir Aıyrtaý aýdanyndaǵy Aıǵanym qonysy boıynsha materıaldar jınap jatyr.








Joǵary qaraı