Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da maıly daqyldardyń 74 paıyzy jınap alyndy

2021 jyldyń 12 qazan 2021 19:10

PETROPAVL. QazAqparat – Soltústik Qazaqstan oblysynda shamamen 3 mln tonna bıdaı jınap alynsa, maıly daqyldardyń 444 myń tonnasy bastyryldy, dep habarlaıdy QazAqparat tilshisi.

SQO aýyl sharýashylyǵy jáne jer qatynastary basqarmasynyń málimetinshe, bıdaı shashaýsyz jınap alyndy, aldyn ala derekter boıynsha 3 mln tonnadan astam astyq bastyryldy, gektarynan orta eseppen 11 tsentnerden ónim alyndy. Qazirgi ýaqytta alqap basynda maıly daqyldardyń oraǵy qyzǵan. Maıly daqyldar 709,7 myń ga nemese 74,1 %-y jınaldy, 444 myń tonna bastyryldy, gektar berekeliligi - 6,2 tsentner.

«Jem-azyq qysqa josparly túrde ázirlenip jatyr. Qajettilik 850 myń tonna bolsa, 853 myń tonna shóp daıyndaldy. Sondaı-aq artyǵymen - 203,2 myń tonna pishendeme, 196,1 myń tonna súrlem ázirlendi. Al saban boıynsha qajettilik 784 myń tonna bolsa, sonyń 730,3 myń tonnasy jınaldy. Sondaı-aq kerekti 764,6 myń tonna jemniń jartysynan astamy bar. Turǵyndar 100 % jem-azyqpen qamtyldy», - delingen habarlamada.

SQO boıynsha 389,4 myń tonna kartop, 73,2 myń tonna kókónis jınaldy. Ónimdiligi shamamen gektarynan 130 tsentner.

Lıtsenzııalanǵan astyq qabyldaý kásiporyndary jańa bıdaıdyń 899 myń tonnasyn qabyldady. Oblys boıynsha azyq-túlik korporatsııasy 348,5 myń tonna bıdaıdy forvardtyq satyp alýǵa kelisim-shart jasaǵan. Búgingi kúni azyq-túlik korporatsııasyna tapsyrý úshin jelilik elevatorlarǵa 164,9 myń tonna astyq jetkizilgen.

Qazirgi ýaqytta kelesi jyldyń kóktemgi egisine daıyndyq jumystary júrgizilip jatyr.

Mamandardyń aıtýynsha, agrohımııalyq sharalardyń qajetti kesheni tolyq kólemde júrgizildi. Jerge 158,5 myń tonnadan astam mıneraldy tyńaıtqyshtar sebildi. Jospar boıynsha 2,5 mln ga-ǵa 160 myń tonna engizilýi kerek, bul ótken jyldan 25 myń tonnaǵa artyq. Sondaı-aq kelesi jylǵa 482,6 myń tonna tuqym ázirlendi, jalpy 500 myń tonnaǵa jýyq astyq osy maqsatqa saqtalmaq.


Joǵary qaraı