SQO-da boranǵa baılanysty eki aýdanda joldar jabyldy
PETROPAVL. QazAqparat – Soltústik Qazaqstan oblysynda borannyń kúsheıýine baılanysty Aıyrtaý jáne Taıynsha aýdandarynda trassalar jabyldy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, aýa raıynyń buzylyp, borannyń kúsheıýinen jáne Aqmola oblysy aýmaǵynda jol qozǵalysynyń shektelýine baılanysty saǵat 15.10 mınýt ketkende Aıyrtaý jáne Taıynsha aýdanynda joldar jabyldy.
Jol qozǵalysy kóliktiń barlyq túrleri úshin 3 respýblıkalyq joldarda:
1) Kókshetaý-Rýzaevka (Akmola oblysy men Saýmalkól eldi mekeni aralyǵyndaǵy 61-102 km)
2) Kókshetaý-Omby (Aqmola oblysy men Chkalov eldi mekeni aralyǵyndaǵy 50-85 km)
3) Nur-Sultan -Petropavl (Aqmola oblysy men Kellerovka eldi mekeni - 341-367 km) trassalarynda shekteldi.
Qutqarýshylar tótenshe jaǵdaı jáne oqys oqıǵa týyndaǵanda 112 telefon nómirine táýlik boıy habarlasýǵa bolatynyn eske salady.
Buǵan deıin SQO TJD sms-habarlama jáne «Dármen» mobıldi qosymsha arqyly oblys aýmaǵynda 15-16 qańtar kúnderi qatty boran turatynyn eskertken edi.
