Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

SQO-da 31 sottalǵan probatsııa qyzmetiniń talaptaryn buzǵany úshin bostandyǵynan aıyryldy

2022 jyldyń 15 mamyr 2022 05:18

PETROPAVL. QazAqparat – Soltústik Qazaqstan oblysynda probatsııa qyzmeti esepke alynǵan 25 jasqa deıingi jigitterge tergeý ızolıatoryna ekskýrsııa uıymdastyrdy. Óıtkeni tıisti talaptardy oryndamaǵany úshin tek bıyl 31 sottalǵan túrmege otyrǵyzylǵan, dep habarlaıdy QazAqparat tilshisi.

SQO boıynsha qylmystyq-atqarý júıesiniń ES-164/1 mekemesine, ıaǵnı tergeý ızolıatoryna Petropavl qalasynyń probatsııa qyzmetiniń esebinde turǵan sottalǵandarǵa ekskýrsııa uıymdastyryldy. Jigitterdiń jasy – 20-25 aralyǵynda. Olar mekemeniń kún tártibimen, sondaı-aq turý sharttarymen tanysty.

«Bul jigitter buryn bas bostandyǵynan aıyrý oryndarynda bolmaǵan. Ekskýrsııanyń maqsaty – olarǵa talapty oryndamaǵan jaǵdaıda qaıda keletinderin kórsetip, túsindirý. Mundaı tájirıbeni alǵash ret qoldanyp otyrmyz. Búgin 10 adamdy alyp keldik. Bolashaqta toqsan saıyn osyndaı is-shara ótkizýdi josparlap otyrmyz», - deıdi Petropavl qalalyq probatsııa qyzmeti bóliminiń bastyǵy Azamat Mákenov.

Esimin ataǵysy kelmegen jigitke jazasyn ótep bolýǵa 3 aı qalǵan eken. Onyń «Densaýlyqqa qasaqana aýyr zııan keltirý» jáne «Buzaqylyq» baptary boıynsha 3 jyl 2 aıǵa bas bostandyǵy shektelgen.

«Búgin men tergeý ızolıatoryn ishinen birinshi ret kórdim. Qorqynyshty boldy. Men apta saıyn belgilenýge barǵanda, ınspektorlar menimen profılaktıkalyq áńgime ótkizedi. Biraq, búgin men aspandy tor arqyly óz kózimmen kórdim. Boıymdy qorqynysh sezimi bıledi. Men munda túskim kelmeıdi. Endi zańdy buzbaýǵa tyrysamyn», - deıdi sottalǵan.

SQO boıynsha qylmystyq-atqarý júıesi departamenti baspasóz qyzmetiniń málimetinshe, bıylǵy 4 aıdyń ishinde 31 sottalýshy talaptardy buzǵany úshin bas bostandyǵynan aıyryldy. Byltyr osy sebeppen probatsııa qyzmetiniń esebinde turǵan 142 adamnyń jazasy qatańdatylǵan.

«Probatsııa qyzmetine bas bostandyǵynan aıyrylmaǵan sottalǵandar esepke alynady. Olar qoǵamdyq jumysqa tartylǵandar, bas bostadyǵy shektelgender, shartty túrde jazasyn óteýshiler, jazasyn keıin óteıtinder nemese belgili bir qyzmettiń túrimen aınalysýǵa tyıym salynǵandar. Olardyń árqaısysy zańmen kórsetilgen belgili bir talaptardy oryndaýlary qajet. Alaıda jazasyn óteýshilerdiń keıbiri sottyń jáne probatsııa qyzmetiniń talaptaryn oryndaǵysy kelmeıdi. Keıbiri tipti tyǵylyp, qashpaq bolady. Mundaıda sottalǵandardyń jazasy qatańdatylyp, bas bostandyǵynan aıyrylady», - deıdi SQO boıynsha QAJD bastyǵy Rýstan Ahmetjanov.



Joǵary qaraı