Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

SQO-da 30 meıirbıke merekege oraı túrli marapatqa ıe boldy

2022 jyldyń 12 mamyr 2022 21:00

PETROPAVL. QazAqparat – Soltústik Qazaqstan oblysynda Halyqaralyq meıirbıke kúnine oraı 30 meıirbıke túrli marapatqa ıe boldy. 45 jyldyq eńbek ótili bar Aıman Qurmanǵalıeva «Eńbek ardageri» atandy, dep habarlaıdy QazAqparat tilshisi.

Petropavl turǵyny Aıman Qurmanǵalıeva 45 jyl buryn anasynyń aqylymen Qaraǵandy medıtsınalyq ýchılıesine oqýǵa túsip, meıirbıke mamandyǵyn alyp shyǵady. 1971 jyly shaqyrtýmen qazirgi Aqqaıyń aýdany Aralaǵash aýylyndaǵy feldsherlik-akýsherlik pýnktke jumysqa ornalasady. Keıin Petropavldaǵy birneshe emdeý mekemesinde eńbek etip, 10 jyl buryn zeınet demalysyna shyqty.

«Qazirgi meıirbıke men bizdiń kezimizdegi meıirbıkeniń jumysyn salystyrýǵa bolmaıdy ǵoı. Bári jańa, zamanaýı qondyrǵylar. Biz ıne-shprıtsterdi ózimiz zalalsyzdandyratynbyz, qazir bir rettik shprıtspen dári egiledi ǵoı. Hırýrgııa bólimshesinde jumys istedim, ol kezde jansaqtaý bólimshesi degen joq. Otadan keıin birden palataǵa ákeledi. Naýqastardy balasha kútemiz. 1 meıirbıkege 60 kisi bolatyn», - deıdi Aıman Qurmanǵalıeva.




Zeınetker 16 mamyr kúni 70 jyldyq mereıtoıyn atap ótedi. Júzdegen adamnyń aıaqqa turyp ketýine sebepshi bolǵan Aıman Qabıdollaqyzy búgin – Halyqaralyq meıirbıkeler kúnine oraı «Eńbek ardageri» atandy. Marapatty oǵan Soltústik Qazaqstan joǵary medıtsınalyq kolledjinde uıymdastyrylǵan saltanatty sharada oblys ákiminiń orynbasary Tımýr Sultanǵazıev tabys etti.

Tımýr Sultanǵazıevtiń aıtýynsha, meıirbıkeler kúni ol úshin de kásibı mereke bolyp esepteledi. Óıtkeni densaýlyq saqtaý salasyndaǵy alǵashqy eńbek jolyn Almaty qalalyq aýrýhanasynda meıirger bolyp bastaǵan eken.




«Densaýlyq – basty baılyq. Densaýlyqsyz baqytty ómir súrý múmkin emes. Sondyqtan meıirbıkeniń jumysy qashanda suranysqa ıe bolmaq. Meıirban jandardyń biliktiliginen, kásibı mindetine jaýapkershilikpen qaraýynan, adamdarǵa jylýlyq syılap, kómektesýge daıar turýynan densaýlyq saqtaý salasynyń jaǵdaıyn baǵalaýǵa bolady. Sizderge kúndelikti qıyndyqqa toly jumystaryńyzdy, kásibı mindetterińizdi adal atqarǵandaryńyz úshin alǵysymdy bildiremin», - dedi Tımýr Sultanǵazıev.

Bul kúni óńirdiń 30 meıirbıkesi túrli marapatqa ıe boldy. Saltanatty shara jergilikti ónerpazdardyń kontsertine ulasty.





Joǵary qaraı