Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da 3 jasar qyzyn uryp óltirgen kelinshekke qatysty sot otyrysy bastaldy

2021 jyldyń 14 maýsym 2021 19:19

PETROPAVL. QazAqparat – Soltústik Qazaqstan oblysy kámeletke tolmaǵandardyń isi boıynsha mamandandyrylǵan aýdanaralyq sotynda úsh jasar qyzyn uryp óltirgen kelinshekke qatysty sot otyrysy bastaldy, dep habarlaıdy QazAqparat tilshisi.

Oqys oqıǵa bıyl aqpan aıynda bolǵan edi. 3 jasar Aleksandra Zaharovany týǵan anasy ólimshi etip uryp, sábı es-tússiz balalar aýrýhanasyna jetkizildi.

Dárigerler sábıdiń ómiri úshin kúreskenimen, em-dom nátıje bermedi. 1 aı boıy reanımatsııa bóliminde komada jatqan bala esin jımastan jan tapsyrdy.

22 jastaǵy Ekaterına Goleshovaǵa birden 3 bap boıynsha aıyp taǵylǵan.

Kelinshek 18 jasta tuńǵysh balasy Aleksandra Zaharovany dúnıege ákele sala, jetimder úıine tapsyrǵan eken.

Kishkentaı qyzdy anasynyń kelisimimen týysy – erli-zaıypty Vıtalıı men Tatıana Zaharovtar ýaqytsha qolyna alady.

Keıin búldirshin sal aýrýyna shaldyǵyp, anasy múldem bezip ketken.

«Ol eshqashan qyzyn jaqsy kórip, baýyryna tartqan emes. Jańa jyldyń aldynda Sashany resmı túrde asyrap alýdy josparlaǵan edik. Sol úshin tıisti qujattardy jınaı bastadyq. Týǵan anasy bizge qolhat jazyp, baladan bas tartýy tıis bolatyn. Biraq, ol oıynan aınyp, qyzdy alyp ketti. Osylaısha Sashadan aıyrylyp qaldyq», - deıdi Vıtalıı Zaharov.

Erli-zaıypty qyzdy 2020 jyldyń jeltoqsanynda týǵan anasyna bergen. Al 2021 jyldyń 17 qańtarynda sábı es-tússiz, aýyr halde oblystyq balalar aýrýhanasyna jetkizildi.

Goleshova qyzdy uryp-soqqanyn moıyndap otyr. Sot materıaldaryna súıensek, sábıdiń kórmegen qorlyǵy joq.

Bas súıegi synǵan, qoly kúıgen, tisteri túsip qalǵan, aıaǵy úsigen.

Alǵashqy sot otyrysy 3 saǵatqa sozyldy. Kelesisi 23 maýsymǵa josparlanǵan.

Qyzdyń anasy 12 jylǵa deıin bas bostandyǵynan aıyrylýy múmkin.


Joǵary qaraı