Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da 2100-den astam taýardan synama alynsa, onyń 17,5 paıyzy talapqa saı emes

2021 jyldyń 14 qyrkúıek 2021 19:25

PETROPAVL. QazAqparat – Soltústik Qazaqstan oblysynda ónim qaýipsizdiginiń monıtorıngi aıasynda 174 saýda nysanynan 2119 taýar synamasy alynyp, zertteldi, onyń 372-si gıgıenalyq normatıvter men tehnıkalyq reglamentter talaptaryna sáıkes kelmedi, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, vedomstvo ónim qaýipsizdiginiń monıtorıngi aıasynda aı saıyn azyq-túlik jáne azyq-túlik emes taýarlardyń sapasyn tekseredi.

Alynǵan ónimderdiń synamasy «Ulttyq saraptama ortalyǵynyń» akkredıttelgen zerthanalarynda zertteledi.

«8 aıdyń ishinde oblystyń aýmaqtyq sanıtarııalyq-epıdemıologııalyq baqylaý basqarmalary 174 saýda nysanyn tekserdi. Olardyn 2119 synama alyndy jáne zertteldi, nátıjesinde 372 úlgi - 17,56 %-y gıgıenalyq normatıvter men tehnıkalyq reglamentter talaptaryna sáıkes kelmedi. Onyń ishinde 1321 synama azyq-túlikten alyndy, 234-i - 17,71 %-y sáıkes kelmedi. Azyq-túlik emes sanattaǵy 798 synamanyń 138-i - 17,29 %-y talapqa saı bolmaı shyqty», - deıdi SQO sanıtarııalyq-epıdemıologııalyq baqylaý departamentiniń tehnıkalyq reglamentterdiń talaptaryn baqylaý bóliminiń basshysy Danııar Ospanov.

Azyq-túlik ishinde talapqa sáıkes kelmegen ónimderdiń eń kóp úlesi - balyq jáne balyq ónimderine tıesili - 48,57 %. Qus eti, qus ónimderiniń 34,75 %-y, et jáne et ónimderiniń 21,25 %-y normatıvke saı bolmaǵan.

«Azyq-túlik emes ónimderdiń ishinde 50 % jeńil ónerkásip ónimi, 37,5 % balalar oıynshyqtary, 7,33 % parfıýmerlik-kosmetıkalyq, aýyz qýysy gıgıenasy quraldary sáıkes kelmegen. Azyq-túlikke qatysty óndirýshiler negizinen tańbalaý talaptaryn buzǵan, bul - 75,5 %-dy alady. Fızıka-hımııalyq kórsetkishter boıynsha - 16,6 %, mıkrobıologııalyq kórsetkishter boıynsha 3,2 %, tańbalaýda málimdelgen ónimge sáıkessizdik, ıaǵnı tutynýshyny aldaý nemese jańylystyrý - 2,1%, qaýipsizdik kórsetkishteri boıynsha 1,3 %, ózge kórsetkishter boıynsha 1,3 %. Qoldanystaǵy zańnama boıynsha, saýda oryndaryna anyqtalǵan talapqa saı kelmeıtin ónimder boıynsha nusqama berildi», - deıdi bólim basshysy.

Sondaı-aq, departament mamandary maýsym-tamyz aılary aralyǵynda zerthanaǵa baqsha daqyldarynyń 22 synamasy jetkizgen, olardyń barlyǵy talapqa saı sapaly bolyp shyqty.

«QR DSM Sanıtarııalyq-epıdemıologııalyq baqylaý komıtetiniń saıtynda http://reestr-np.kz/rus/ «Sáıkes kelmeıtin ónimder tizilimi» ornalastyrylǵan, onda árbir tutynýshy, ótkizýshi, óndirýshi tehnıkalyq reglamentterdiń talaptaryna sáıkes kelmeıtin taýarlardyń ataýlaryn, sondaı-aq olardy kim óndirgenin, olar qandaı saýda nysandarynda satylǵanyn kóre alady. Bul tizim aı saıyn ónim qaýipsizdigi monıtorınginiń qorytyndysy boıynsha tolyqtyrylyp otyrady», - deıdi Danııar Ospanov.


Joǵary qaraı