Aýa raıy
Astana -18 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da 20 kúnde karantın talabyn buzýǵa qatysty 700-den astam derek tirkeldi

2020 jyldyń 11 tamyz 2020 05:00

PETROPAVL. QazAqparat – Soltústik Qazaqstan oblysynda monıtorıng toptary jumysyn bastaǵaly karantın talabyn buzýdyń 757 deregi anyqtaldy, dep habarlaıdy QazAqparat.

SQO Polıtsııa departamenti baspasóz qyzmetiniń málimetinshe, óńirde 20 shildeden bastap karantındik shekteýlerdiń saqtalýyn qadaǵalaý maqsatynda monıtorıng toptary jumys istep jatyr. Maqsaty – halyqty qaýipti indetten qorǵaý jáne karantın rejıminiń buzylýyna jol bermeý.

Osyǵan qaraı adamdar jappaı jınalatyn oryndar tekserýshilerdiń basty nazaryna alyndy. Birinshi kezekte dúkender tekserildi.

Tártip saqshylarynyń aıtýynsha, keıbir saýda oryndarynyń ıeleri men qyzmetkerleri adamdarmen únemi tyǵyz qarym-qatynasta bola tura, maska taqpaıdy, qolǵap kımeıdi. 30 kúnniń ishinde oblysta osyndaı 200-den astam derek anyqtaldy. Uqsas faktiler 24 dámhanada jáne 7 demalys bazasynda tirkeldi. Eń óreskeli – klıentteriniń áleýmettik ara qashyqtyqty saqtamaýy. Sondaı-aq demalys kúnderi karantındik shekteýlerdiń kúsheıtilgenine qaramastan eki demalys orny demalýshylardy qabyldaǵan.

«Oblystyń bas sanıtarııa dárigeriniń qaýlysymen qabyldanǵan shekteýler indet juqtyrý qaýpin tómendetýge baǵyttalǵan. Alaıda turǵyndar arasynda áli kúnge karantın talaptaryn elemeıtinder bar. Adamdar maska taǵýda salǵyrttyq tanytady. Keı kásipkerler jaýapkershilikten paıdany joǵary qoıady. Tabys tabý úshin tyıymdarǵa kóz jumyp, kelýshilerdiń ómiri men densaýlyǵyn qaýipke tigedi», - dedi SQO PD bastyǵynyń birinshi orynbasary Qanat Aıtbaev.

Buǵan deıin úı karantınine alynǵandardyń mobıldi qosymsha arqyly qadaǵalanatynyn aıtqan edik. Úı karantınine otyrǵyzylǵan naýqastar jáne olarmen baılanysta bolǵandar óz betimen oqshaýlaný jaıynda qolhat bergenimen, 20 shildeden beri bul mindettemeni 21 adam buzǵan.

Jalpy SQO-da monıtorıngtik toptar jumysyn bastaǵaly karantın talabyn buzýǵa qatysty 757 derek anyqtaldy, onyń 295 Petropavlda tirkelgen.


Joǵary qaraı