Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Shymkentte VІ respýblıkalyq ákeler forýmy ótýde

2021 jyldyń 5 qarasha 2021 13:10

ShYMKENT . QazAqparat - Shymkent qalasynda «Ákege qarap ul óser» atty VІ respýblıkalyq ákeler forýmy ótýde, dep habarlaıdy QazAqparat tilshisi.

Qalalyq ákimdiktiń qoldaýymen jáne «Ákeler odaǵy» respýblıkalyq qoǵamdyq birlestigi uıymdastyrǵan forýmǵa elimizdiń barlyq óńirinen delegattar qatysýda.

Atap aıtqanda, otbasylyq saıasatqa jaýapty ortalyq jáne óńirlik memlekettik organdardyń, qoǵamdyq birlestikterdiń, halyqaralyq uıymdardyń, Qazaqstan musylmandary dinı basqarmasy men Qazaqstan halqy Assambleıasynyń jáne ǵylymı-sarapshylyq qaýymdastyqtyń ókilderi ákeler ınstıtýtyn damytý máselesin birlesip talqylaýda.

Sonymen qatar alqaly jıynda QR Parlamenti Senatynyń depýtaty, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi Lázzat Súleımen, QR Parlamenti Májilisiniń depýtaty Baqytbek Smaǵul, QR Aqparat jáne qoǵamdyq damý vıtse-mınıstri Asqar Ýmarov, BUU halyqtyń qonystanýy salasyndaǵy qorynyń (ıÝNFPA) Qazaqstandaǵy atqarýshy ókili Raıymbek Seısemálıev sóz sóılep, óz pikirlerin ortaǵa saldy.




Otbasy ınstıtýtyn nyǵaıtý jáne er adamdardyń otbasyndaǵy róli men jaýapkershiligin arttyrý maqsatynda uıymdastyrylǵan forým barysynda Shymkent qalasy ákiminiń birinshi orynbasary Shyńǵys Muqan da jıynnyń mańyzyn atap ótti.

«Búginde qoǵam aýqymdy transformatsııany basynan ótkizýde. Osylaı jedel ózgerip jatqan qoǵamdaǵy er azamattardyń orny men róli, onyń moınyndaǵy mindetter qandaı? HHІ ǵasyr jaǵdaıynda jaqsy ákege qandaı talaptar qoıylady? Búgingi forým, mine, osy máselelerdi ashyq talqylaýymen mańyzdy dep oılaımyn. Sonymen búgingi ákelerdiń eń mańyzdy mıssııasy qandaı? Meniń oıymsha qazirgi ákeniń basty mindeti – áıelderi baqytty etý. Sebebi, áıel baqytty bolsa, bala da, otbasy da baqytty bolady. Tipti, áıel baqytty bolsa, álem baqytty desek te artyq aıtqandyq emes, – dedi Shyńǵys Muqan.




Qala ákiminiń birinshi orynbasary sondaı-aq, Gerrı Chepmenniń «Mahabbattyń 5 tili» atty kitaby aǵylshyn tilinen qazaq tiline aýdarylyp jatqanyn aıtty.

«Bul kitapta avtor otbasy baqytty bolýy úshin mynadaı 5 tásildi qoldanýdy usynady. Olar: jaqsy sóz aıtý, ýaqytty mazmundy ótkizý, syılyq berý, bir-birine adal qyzmet etý jáne fızıkalyq qarym-qatynas. Búgingi er azamattar osy bes máselege muqııat bolsa, jary men balalaryn baqytty ete alady dep oılaımyn. Bul óz kezeginde elimizde otbasy ınstıtýtynyń nyǵaıýyna yqpal etedi», – dedi Sh.Muqan.














Joǵary qaraı