Aýa raıy
Astana -23 °S
Almaty -8 °S
valıýta baǵamy
USD 421.58
EUR 496.83
RUB 5.53
CNY 62.20

Shymkentte bokstan Qazaqstan chempıonaty márege jetti

2020 jyldyń 29 qarasha 2020 16:48

NUR-SULTAN. QazAqparat – Shymkent qalasynda erler jáne áıelder arasynda ótken bokstan Qazaqstan chempıonaty márege jetti, dep habarlaıdy QazAqparat tilshisi.

Álemde «qazaqtardyń salmaǵy» atanyp ketken 69 kelide qaraǵandylyq Abylaıhan Júsipov pen jambyldyq Aslanbek Shymbergenov rıngke shyqty.

Ekeýi de – halyqaralyq jarystarda olja salyp júrgen sportshylar. Abylaıhan álem birinshiliginde eki márte qola medaldi jeńip alsa, Aslanbek – Azııa chempıonatynyń kúmis júldegeri.

Bul kezdesýde Aslanbektiń qabaǵy jarylyp ketip, jekpe-jek merziminen buryn aıaqtalyp, jeńis A.Júsipovke berildi.

Esesine 75 kg salmaqta taǵy bir jambyldyq Ábilhan Amanqul atyraýlyq Nurqanat Raıysty utyp, jeńimpaz atandy.

91 kg salmaqta qos elordalyq boksshy Aıbek Oralbaı men Saǵyndyq Toǵambaı fınalda judyryqtasty. Bir qyzyǵy, ekeýiniń bapkerleri de bir, Asqar Erkebaev eken.

Bul joly A.Oralbaı jeńis tuǵyryna kóterildi. Osy salmaqta Rıo olımpıadasynyń kúmis júldegeri Vasılıı Levıt syrqattanyp qalýyna baılanysty jarysqa qatysqan joq.

Asa aýyr salmaqta Qazaqstan ulttyq quramasynyń kapıtany, álem chempıonatynyń eki márte kúmis júldegeri, qyzylordalyq Qamshybek Qońqabaev túrkistandyq Nurlan Saparbaıdy jeńdi.

63 kg salmaqta aqmolalyq Ersultan Bolat fınalda rıngke shyqpaǵandyqtan, jeńis Almaty oblysynyń ókili Ertýǵan Zeınýllınovke berildi.

Osylaısha Qazaqstan chempıonaty márege jetti, oǵan olımpıada lıtsenzııasyna ıe bolǵan boksshylardyń da qatysýy doda deńgeıiniń joǵary ekendigin tanytty. Kútpegen nátıjeler de bolmaı qalǵan joq. Birqatar jas boksshylar ataqty sportshylardy joldan taıdyrdy.

«Olımpıadaǵa joldama alǵan bes boksshymyz jeńimpaz atanyp, sol lıtsenzııaǵa laıyq ekendigin kórsetti. Ókinishke qaraı, Zákir Safıýllın jaraqatyna baılanysty sheshýshi básekege qatysa almady. Vasılıı Levıt te jarystan tys qaldy. Osy chempıonatta jastar jaqsy kórindi. Ásirese, 52 kg salmaqta básekelestik kúshti boldy. Jas boksshy Mahmud Sabyrhan joldama ıegeri Sáken Bıbosynovtan basym tústi. Sondaı-aq 49 kg salmaqta 18 jastaǵy batysqazaqstandyq Danııal Sábıt asa tájirıbeli boksshy Temirtas Júsipovti 5:0 esebimen utyp, kóńilimizden shyqty. Endi Tokıo olımpıadasyna jarty jyldaı ýaqyt qaldy. Basty maqsat – soǵan myqtap daıyndalý», deıdi Qazaqstan erler quramasynyń bas bapkeri Ǵalymbek Kenjebaev.

Áıelder arasynda jalpykomandalyq esepte Nur-Sultan qalasy (3 altyn, 2 kúmis, 1 qola) kósh bastasa, Qostanaı oblysy (2 altyn, 1 qola) ekinshi, shymkenttikter (1 altyn, 3 kúmis) úshinshi orynǵa ıe boldy.

Eske sala keteıik, budan buryn Nazym Qyzaıbaıdyń Tokıo olımpıadasynyń joldamasyn jeńip alǵysy keletinin, áıelder arasynda barlyq chempıondar anyqtalǵanyn jazǵan bolatynbyz.

Sondaı-aq 18 jastaǵy boksshy Azııa chempıonyn utyp ketse, Bekzat Nurdáýletov Qazaqstan birinshiliginde top jardy.


Avtor Eljan Eraly
Basty sózder: Sport, Shymkent, Boks,
Joǵary qaraı