Aýa raıy
Astana -17 °S
Almaty -6 °S
valıýta baǵamy
USD 421.58
EUR 496.83
RUB 5.53
CNY 62.20

Shyǵysqazaqstandyqtar «Maska taǵyńyz» aktsııasyn bastady

2020 jyldyń 26 qazan 2020 22:12

ÓSKEMEN. QazAqparat – Shyǵys Qazaqstan oblysynyń turǵyndary koronavırýs juqtyrǵandar sanynyń kóbeıip kele jatqanyna baılanysty halyqty maska kııýge shaqyratyn chellendj uıymdastyrdy, dep habarlaıdy QazAqparat tilshisi.

Chellendjge qatysýǵa nıet bildirgender áleýmettik jelilerdegi jeke paraqshalarynda Stories salyp nemese óz ómirinen mysaldar keltirip, heshtegpen post jazýda. Árbir jarııalanǵan jazba - jeke adamnyń tarıhy.

Bireý óz tájirıbesin bólisse, endi biri kórgen jáne estigen oqıǵalaryn aıtady. Kóbiniń táýekel tobyna jatatyn egde jastaǵy ata-anasy, kishkentaı balalary bar.

«Úıden shyqpas buryn mindetti túrde ózime jáne balama maska taǵamyn. Kúz kezinde adamdar aýrýǵa jıi shaldyǵady. Eger árkim óz densaýlyǵyna jaýapkershilikpen qaraıtyn bolsa, bul indetti ońaı eńseremiz. Dostarym men tanystarym munyń qanshalyqty mańyzdy ekenin kórip, oılansyn degen nıetpen chellendjdi qoldaımyn. Maska kıińiz! Qolyńyzdy jıi jýyńyz! Antıseptık qoldanyńyz!» - deıdi Óskemen qalasynyń turǵyny Elena.

Koronavırýs ınfektsııasynyń ekinshi tolqyny búginde kóptegen elderde bastalyp ta ketti. Mysaly, kórshiles Reseıde aýyrǵandardyń sany qazirdiń ózinde qaıtadan júzdegen myńǵa jetip otyr.

Aımaq bıligi aýrýhanalardaǵy oryn jetispeýshiliginiń týyndaýyna jol bermeý, barlyq qajetti zertteýlerdi ýaqtyly júrgizý úshin qoldan kelgenniń bárin jasaýda. Alaıda, óz densaýlyǵymyz úshin jaýapkershilik árqaısymyzdyń óz moınymyzda ekenin umytpaǵanymyz jón.

«Muny chellendj qatysýshylary da jaqsy túsinip, qoldap otyr. Sanıtarlyq normalar men áleýmettik qashyqtyqty saqtaý jáne maska kııý - bul koronavırýs ınfektsııasymen qatar maýsymdyq tumaýdyń da aldyn-alýdyń eń tıimdi tásili. Belsendi shyǵysqazaqstandyqtar maska kıip, jaqyndaryńyzǵa qamqorlyq jasaýǵa shaqyrady», - delingen ShQO aqparat ortalyǵynyń málimetinde.


Joǵary qaraı