ShQO-da jantúrshigerlik jol apatynan 4 adam mert boldy
ÓSKEMEN. QazAqparat – Shyǵys Qazaqstan oblysynda jol-kólik oqıǵasynan 4 adam kóz jumdy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, oqys oqıǵa Shemonaıha aýdanyndaǵy «Óskemen-Shemonaıha-RF» tasjolynyń 88-shi shaqyrymynda bolǵan. Shemonaıha qalasynan Óskemenge qaraı jolǵa shyqqan «KamAZ 5320» kóliginiń 32 jastaǵy júrgizýshisi Rýlıha aýylyna qaraı burylatyn jerde «VAZ 2112» markaly kólikpen soqtyǵysqan.
«Jol-kólik oqıǵasy saldarynan VAZ 2112 avtokóliginiń 25 jastaǵy júrgizýshisi jáne úsh jolaýshysy (31 jastaǵy áıel men 29 jastaǵy eki er adam) oqıǵa ornynda mert boldy», - dep habarlady vedomstvo ókilderi.
Atalǵan fakti boıynsha QR Qylmystyq Kodeksiniń 345-baby 4-bóligimen (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) sotqa deıingi tergeý amaldary bastaldy. Birqatar sot-medıtsınalyq saraptamalar taǵaıyndaldy, sonyń nátıjeleri boıynsha protsessýaldyq sheshim qabyldanady.
