ShQO-da karantın talabyn buzǵan túngi klýb ıesi jaýapqa tartylmaq

ÓSKEMEN. QazAqparat – Shyǵys Qazaqstan oblysynda monıtorıngilik toptar reıd sharalaryn jalǵastyrýda, dep habarlaıdy QazAqparat tilshisi.

Qazirgi ýaqytta óńirde 128 monıtorıngilik top jumys isteýde. Olardyń maqsaty – karantın kezindegi shekteý sharalarynyń saqtalýyn baqylaý. Shyǵys Qazaqstanda koronavırýstyń taralý qarqyny artyp, oblys «qyzyl aımaqta» tursa da, keıbir azamattar áli de zańǵa baǵynbaýda.

22 qarashadan 23-ine qaraǵan túnde Óskemen jáne Semeı qalalarynda kezekti reıd júrgizildi. Sonyń nátıjesinde Óskemendegi «Red Bulls» túngi klýby, «Solnechnaıa» monshasy men Semeıdegi «Pechkı-lavochkı» kesheninde ShQO Bas memlekettik sanıtarlyq dárigeri bekitken shekteýlerdiń buzylǵany tirkeldi.

«Monıtorıngilik top kelgen kezde túngi klýbta áleýmettik qashyqtyqty saqtamaǵan 70-ten astam adam bolyp, saýnalar men monshalarda dastarhan jaıylyp, ondaǵan adam kóńil kótergeni belgili boldy. Osyǵan oraı quqyq qorǵaý organdary atalǵan mekeme basshylaryn ákimshilik jaýapkershilikke tartý maqsatynda sanıtarlyq-epıdemıologııalyq baqylaý organdaryna tıisti materıaldar jiberdi», - delingen ShQO Aqparat ortalyǵy taratqan málimette.