ShQO-da brakonerler men orman órtteri dron arqyly baqylanbaq
ÓSKEMEN. QazAqparat – Shyǵys Qazaqstan oblysynda brakonerler men orman órtteri dron arqyly baqylanatyn bolady, dep habarlaıdy QazAqparat tilshisi.
ShQO orman sharýashylyǵy jáne janýarlar dúnıesi ınspektsııasynyń málimetine súıensek, óńir boıynsha Qazaqstan aýmaǵyndaǵy orman qorynyń jartysynan astamy shoǵyrlanǵan.
Osy rette aǵashtardy zańsyz kesetinder men órttiń shyǵýy ormanǵa eleýli zalal keltirýde. Máselen, bıylǵy mamyr aıynda bolǵan órtten memleketke keltirilgen shyǵyn mólsheri – 252 mıllıon teńgeden asqan.
«Endi 2022 jyldan bastap ushqyshsyz ushý apparaty ınspektorlarǵa aýmaqty baqylaýǵa kómektesedi. Drondy paıdalaný orman qory men erekshe qorǵalatyn tabıǵı aýmaqtardy kúzetýge, zańsyz aǵash kesý men órtterdiń aldyn alýǵa jáne janýarlar álemin baqylaýǵa múmkindik beredi», - dedi ınspektsııa basshysy Dildábek Orazbaev.
