Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Sheteldegi qazaqtildi BAQ-pen tájirıbe almasýdy jolǵa qoıý kerek – Eldos Nashıralı

2021 jyldyń 27 qazan 2021 16:39

NUR-SULTAN. QazAqparat – Sheteldegi qazaqtildi BAQ ókilderimen tájirıbe almasýdy jolǵa qoıý kerek. Mundaı usynysty «QazAqparat» HAA AQ basqarma tóraǵasy Eldos Nashıralı bildirdi, dep habarlaıdy QazAqparat tilshisi.

«Táýelsizdigimizdiń arqasynda sheteldegi qandastarymyzdy elge ákelýmen qatar, ondaǵy jurtshylyqpen tyǵyz baılanys ornatýdyń múmkindigi týdy. Osy oraıda «Otandastar qorynyń» basshylyǵyna alǵys aıtamyz.

Búgin qurylyp otyrǵan Sheteldegi qazaqtildi BAQ assotsıatsııa qyzmetine qatysty birneshe usynys bar. Sonyń birinshisi, otandyq jáne sheteldegi qazaqtildi BAQ ókilderiniń ózara tájirıbe almasý jaǵy qarastyrylsa. Sheteldegi áriptesterimiz elge kelip, óz tájirıbelerimen bólisse, tıisinshe biz olarmen bólise otyrsaq degen nıet bar. Nemese onlaın uıymdastyrýǵa da bolady. Ekinshi usynys, birneshe jyl boldy «QazAqparat» agenttiginiń saıtyna apta saıyn «Sheteldegi qazaqtildi BAQ jumysyna sholý» shyǵyp turady. Qazirgi tańda shetelde qazaqtildi 88 BAQ-tyń jumys istep turǵany jańa ǵana aıtyldy. Osy oraıda sol BAQ-tarmen ózara aqparat almasý jaǵyn alǵa qoısaq», - dedi Eldos Nashıralı Sheteldegi qazaqtildi BAQ assotsıatsııasynyń qurylýyna arnalǵan sharada.

Sondaı-aq basqarma tóraǵasy «Otandastar qorynyń» saıtynda arnaıy aıdar ashý ıdeıasyn da usyndy.

«Kelesi másele, bizdiń bilýimizshe Mońǵolııa, Ózbekstan elderindegi qazaqtildi BAQ-tyń saıty joq. Bul osydan 2 jyl buryn talqylanǵan másele. Osy oraıda atalǵan elderdegi BAQ-tyń ınternet-paraqshalaryn ashýǵa qol ushymyzdy sozyp, septigimizdi tıgizsek degen usynys bar», - deıdi ol.

Aıta keteıik, búgin Qazaqstanda sheteldegi qazaqtildi buqaralyq aqparat quraldarynyń basyn biriktirgen assotsıatsııa quryldy.

Atalǵan qoǵamdyq uıymǵa QR Parlamenti Senatynyń depýtaty Nurtóre Júsip tóraǵalyq etedi.


Avtor Álı Ibraev
Basty sózder: Qoǵam, Azamattyq qoǵam, Qandastar, BAQ,
Joǵary qaraı