Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Shetel qazaqtary Astanada bas qosty

2018 jyldyń 6 qarasha 2018 17:18

ASTANA. QazAqparat - 10 elde turatyn qandastarymyz elordada bas qosty, dep habarlaıdy QazAqparat tilshisi.

«Qasıetti qazaq eli» atty taqyryppen ótken kezdesýge 10 elden 35 otandasymyz qatysty. Onyń ishinde Ózbekstan, Qyrǵyzstan, Túrkııa, Qytaı jáne taǵy basqa elder bar.

«Bar qazaqtyń bir ǵana otany bar, ol - Qazaqstan. Bizdiń búgingi sanymyz - 16 mıllıon. Onyń 12 mıllıony - elimizde, qalǵan 4 mıllıony shetelde turady. Jalpy 44 memlekette qazaqtar bar, negizgi shoǵyry Qytaı, Ózbekstan jáne Reseıde oranalasqan. Elbasynyń tapsyrmasyna sáıkes, biz sheteldegi otandastarymyzǵa qoldaý kórsetip qana qoımaı, olarmen tyǵyz qarym-qatynas ornatýymyz kerek. Búgingi shara - sonyń dáleli», - dedi Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov.

Jıyn aıasynda «Alystaǵy aǵaıyn» derekti fılminiń tusaýkeseri ótti. Onda HH ǵasyrdyń 30-50 jyldary taǵdyr taýqymetimen Túrkııaǵa kóship barǵan Altaı qazaqtarynyń taǵdyry baıandalady.

«Tarıhı fılmdegi oqıǵany bastan-aıaq baıandaýshy Túrkııa qazaǵy Mansur aqsaqal búginde 75 jasta. Altaı kóshin onyń ákesi bastap barǵan, ol kezde aqsaqal 7 jasta bolǵan. Óziniń aıtýynsha, Altaı qazaqtary 9 aıdyń ishinde 3 myńnan astam shaqyrymdy jaıaý baǵyndyryp, Gımalaı taýyn basyp ótip, Túrkııaǵa jetken. Fılmdi kúni keshe ǵana bitirdik. Shetelde turatyn qazaqtardyń taǵdyry ártúrli. Al, myna qazaqtardyń bastan keshkeni - bólek áńgime. Tarıhı týyndy arhıv materıaldarymen qundy. Osy maqsatta biz Qytaı, Ulybrıtanııa arhıvterimen birlesip jumys istedik. Otandastarymyzdy qoldaýǵa baǵyttalǵan jumystar munymen bitpeıdi», - dedi Z. Turysbekov.

Onyń aıtýynsha, «Alystaǵy aǵaıyn» fılminiń AQSh-ta turatyn qazaqtardyń taǵdyryna arnalǵan bólimi qazir daıyndyq ústinde.

Aıtýly shara Dúnıe júzi qazaqtary qaýymdastyǵy men «Otandastar» qorynyń uıymdastyrýymen ótip otyr.

Eske salsaq, bıyl Prezıdenttiń sheteldegi qazaqtardy qoldaý boıynsha berilgen tapsyrmalary negizinde Dúnıejúzi qazaqtarynyń qaýymdastyǵy janynan «Otandastar» qory qurylǵan bolatyn. Qor sheteldegi jáne Qazaqstanǵa kóship kelgen etnıkalyq qazaqtardy qoldaý maqsatynda quryldy.

Avtor Álı Ibraev
Basty sózder: Qazaq eli, Nur-Sultan, Qandastar,
Joǵary qaraı