Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Sheneýnikterdiń áreketi úshin balalar jazalanbaýy kerek – Arýjan Saın tegin úıirme týraly

2022 jyldyń 24 mamyr 2022 23:00

NUR-SULTAN. QAZAQPARAT – QR Adam quqyqtary jónindegi ýákil Arýjan Saın tegin úıirmeler men sektsııalardaǵy jalǵan tizimder týraly pikir bildirdi jáne memlekettik organdardy máseleni birlesip sheshýge shaqyrdy, dep habarlaıdy QazAqparat tilshisi.

Aıta keteıik, Qazaqstannyń birqatar óńirlerinde bıýdjet qarajatynyń taýsylýyna baılanysty balalardy tegin sektsııalar men úıirmelerge qabyldaý toqtady.

QR Mádenıet jáne sport mınıstri Dáýren Abaevtyń aıtýynsha, júıe jumysynda olqylyqtar bar, ıaǵnı jalǵan tizimder toltyrylyp, olardy qarjylandyrý, úıirmege kelý sanyn kóbeıtip jazý, jetkizýshiler men qarjylandyrýdy qaıtalaý syn-qateri bar.

Onyń aıtýynsha, jetkizýshilerdiń túrli ótinimderinde bir jattyqtyrýshy jıi jazylǵan, keı nysandar shyǵarmashylyq jáne sporttyq tapsyrys boıynsha qaıta-qaıta ótken.

Sonymen qatar, sport mektepteriniń oqýshylaryn qaıta tirkeý faktileri anyqtalǵan.

Arýjan Saınniń aıtýynsha, tegin úıirmeler men sektsııalar jumysyna qarajattyń jetispeýshiligi jergilikti atqarýshy organdardyń bıýdjetti durys bólmeýimen baılanysty. Jergilikti atqarýshy organdar óz óńirleriniń qajettilikterin eskermegen.

ArtSportEdu jetkizýshiler qaýymdastyǵynyń tóraǵasy Lana Bolat habarlaǵandaı, 4-17 jas aralyǵyndaǵy balalardy tegin úıirmelermen qamtý shamamen 10-15%-dy quraıdy nemese 4,5 mln balanyń 700 myńyn ǵana qamtıdy.

Jalpy el boıynsha 8,5 myń qyzmet kórsetýshi jumys isteıdi.

«Óńirlerdiń bir jylǵa salǵan qarajaty árıne, jetkiliksiz boldy, tipti alǵashqy aılarda taýsylyp qaldy. Mádenıet jáne sport mınıstrliginiń qosymsha aqsha bólinetini týraly aqparat bar, biraq máslıhattar otyrysynan keıin is júzinde aqsha tek qyzmet kórsetýshilerdiń aldyńǵy qaryzdaryn óteý úshin ǵana bólinetinin kórip otyrmyz. Ókinishke qaraı, Atyraý oblysynan basqa birde-bir óńir jetkilikti qarajat bólgen joq», - dedi Arýjan Saın elordada ótken konferentsııada.

A. Saın Bas prokýratýraǵa da habarlasqanyn jetkizdi. Jalǵan tizimder men aram pıǵyldy qyzmet kórsetýshiler týraly aıtpas buryn, naqty dálelderdi kórsetý qajet.

«Barlyq baǵyttar boıynsha bıýdjet qarajatyn maqsatsyz paıdalaný máselelerine toqtalsaq: densaýlyq saqtaýda da, áleýmettik qorǵaýda da, bilim berýde de sheneýnikterdiń buzýshylyqtary úshin balalardy jazalaýǵa eshkimniń quqy joq. Aram pıǵyldy jetkizýshiler bolsa, olardy anyqtap, osy qylmystardy jasaǵandaryn dáleldep, jaýapqa tartý kerek. Al balalarmen etene jumys isteıtinder, óz jumystaryn normatıvtik-quqyqtyq aktilerge sáıkes jasaıtyndar zardap shekpeýi kerek, óıtkeni sońynda balalar zardap shegedi. Men barlyǵyn zań aıasynda áreket etýge shaqyramyn», - dedi Bala quqyqtary jónindegi ýákil.


Joǵary qaraı