Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Senat depýtaty Baıqońyrdaǵy mektep máselesin kóterdi

2021 jyldyń 10 maýsym 2021 12:04

NUR-SULTAN. QazAqparat – Bıyl Baıqońyr qalasy men Tóretam eldi mekenin damytýǵa 2,1 mlrd teńge jumsalady. Bul týraly Qarjy mınıstri Erbol Qarashókeev aıtty, dep habarlaıdy QazAqparat tilshisi.

«1994 jylǵy 10 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» keshenin jalǵa berý shartyna ózgeris engizý týraly hattamany ratıfıkatsııalaý týraly» zań jobasyn talqylaý kezinde Senat depýtaty Bekbolat Orynbekov Baıqońyrdaǵy orta bilim máselesin kóterdi.

«Tarıhı ǵarysh kesheni ornalasqan 76 myńnan asatyn turǵyny bar, onyń ishinde 49 myńnan astam Qazaqstan Respýblıkasynyń azamaty bar Baıqońyr qalasyn damytý kezeńinde birqatar problema týyndap otyr. Atap aıtqanda, Reseı tarapynan qoldanystaǵy ıfnraqurylymdy kútip ustaýǵa ǵana qarajat bólinýde. Qaladaǵy turǵyn úı qory jańartylmaıdy jáne ınjenerlik ınfraqurylym men áleýmettik nysandardyń tozyǵy jetken. Qazaqstan tarapy da qoldanystaǵy zańnamalar negizinde Baıqońyr qalasynyń ınfraquyrylym jobalaryn tikeleı qarjylandyra almaıdy. Sonymen qatar qarjy jetispeýshiligi saldarynan QR azamattaryn sapaly bilimmen qamtamasyz etý kezeńinde problema oryn alyp otyr, Atap aıtqanda, qalada 9200 oqýshy tálim alatyn 12 mektep bar. Onyń ishinde Reseı Federatsııasynyń 7 mektebinde 4000 oqýshy jáne Qazaqstannyń 5 mektebinde 5200 oqýshy bilim alýda. Reseılik mektepterdegi 4000 oqýshynyń 1408-i – Qazaqstan Respýblıkasynyń azamattary. Olardyń reseılik bilim berý baǵdarlamasyn oqýyna baılanysty memlekettik grantpen joǵary oqý ornyna túsý kezinde qıyndyqtar týyndaıdy», - dedi depýtat.

Senat ókili qaladaǵy 11 myń páterdiń ıesi óz baspanalaryn óz attaryna qarata almaı júrgenin de eske saldy.

«Qoldanystaǵy zańnamalarǵa ózgeris engizip, jalǵa alý kezinde tólenetin túsimder esebinen Baıqońyr qalasy men oǵan irgeles jatqan Tóretam men Aqaı eldi mekenderin damytýdy qarjylandyrý jumystary qashan jáne qalaı iske asyrylmaq? Baıqońyr qalasynyń 11606 páterinde turyp jatqan QR azamattarynyń baspanasyn jekeshelendirý máselesi qashan jáne qalaı sheshimin tabady», - dep surady Bekbolat Orynbekov.

Qarjy vıtse-mınıstri Erbol Qarashókeevti aıtýynsha, «Baıqońyr» kesheninen túsip jatqan jaldaý aqysyn nysanaly túrde Baıqońyr qalasy men Tóretam, Aqaı eldi mekenderiniń damýyna jiberý –tujyrymdamalyq másele.

«Múddeli memlekettik organdar arasynda ol másele talqylanǵan. Túsip jatqan jaldaý aqysy negizi salyq emes túsim bolǵandyqtan, biryńǵaı bıýdjetke túsedi. Onyń bir bóligin arnaıy túrde bólip alyp, osy eldi mekenderdiń damýyna jiberý múmkin emes. Sebebi ol bıýdjettik prıntsıpterge qaıshy keledi», - degen mınıstrlik ókili soǵan qaramastan, osy eldi mekenderdiń, Baıqońyr qalasynyń ınfraqurylymyn qarjylandyrýǵa tolyq múmkindik bar ekenin atady.

«2021 jyly Baıqońyr qalasy men Tóretam eldi mekenin qarjylandyrý úshin nysanalyq transfert arqyly bıýdjetten 2,5 mlrd teńge quıý josparlanǵan. Jalpy Qyzylorda oblysyna respýblıkalyq bıýdjetten 22,7 mlrd teńge kózdelip otyr. Sol sebepti múmkinshilik bar. Nysanaly transfert arqyly osy maqsattarǵa aqshany jiberýge daıynbyz. Ol úshin árbir mınıstrlik óz quzyretterinde bizge usynystaryn engizýi qajet», - dedi vıtse-mınıstr.

Vedomstvo ókili Baıqońyr qalasyndaǵy 11 myńnan astam páterdi jekeshelendirý máselesin birjola sheshýge baǵyttalǵan protses bastalǵanyn da aıtty.

«Ol úshin qoldanystaǵy turǵyn úı zańnamasyn ózgerister engizýdiń qajeti joq. Birinshiden, ol Qyzylorda oblysynyń ákimdiginiń quzyreti. Jekeshelendirý protsesin bastaý úshin áýeli oblys ákimdigi sol páterlerdi Reseı tarapynyń jaldaýynan shyǵarýy kerek. Jaldaýdan shyǵarý úshin «Baıqońyr» kesheniniń máseleleri jónindegi úkimetaralyq komıssııanyń kún tártibine engizip, Reseı tarapynan, «Baıqońyr» ákimshiliginen kelisim alý kerek. Reseıdiń jaldaýynan shyǵarylǵannan keıin Qyzylorda oblysy ákimdiginiń kommýnaldyq menshigine ótkizip, osyndan keıin qoldanystaǵy zańnama boıynsha jekeshelendirý protsesi júrgiziledi. Ol jumys bastaldy, qazir júrgizilip jatyr», - dedi Erbol Qarashókeev.


Joǵary qaraı