Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Semeıde muǵalimderdi kóshe sypyrýǵa jibergen laýazym ıeleri jaýapqa tartyldy

2021 jyldyń 21 qazan 2021 09:35

NUR-SULTAN. QazAqparat - Semeıde pedagogterdi kóshe sypyrýǵa jibergen laýazymdy tulǵalar ákimshilik jaýapqa tartyldy, dep habarlaıdy QazAqparat QR Bilim jáne ǵylym mınıstrliginiń baspasóz qyzmetine silteme jasap.

Áńgime Semeı qalasy ákiminiń orynbasary D.A. Garıkov týraly bolyp otyr. Sonymen birge ákimniń orynbasaryna qatysty tártiptik sharalar qoldaný týraly hat joldandy.

Semeı qalasy bilim bóliminiń basshysy N.A. Fesenkoǵa qatysty sógis túrinde tártiptik jaza qoldanyldy. Sondaı-aq ol ákimshilik jazaǵa tartyldy.

№ 9 OM dırektory N.V. Tegaı jáne №43 OM dırektorynyń m. a. A.V. Iskrına ákimshilik jaýapqa tartyldy.

Esterińizge sala keteıik, áleýmettik jelilerde 16 qazanda Semeı qalasynyń №43 mektebinde oqý protsesine kedergi keltirip, muǵalimderdi senbilikke kóshe sypyrýǵa jibergeni týraly jarııalanymdar taraǵan bolatyn.

Pedagogterdi qyzmetinen tys jumystarǵa tartý, onyń ústine oqý protsesine kedergi keltirý «Pedagog mártebesi týraly» Zań talaptaryna qaıshy keledi.

QR BǴM Bilim jáne ǵylym salasynda sapany qamtamasyz etý komıtetiniń, sondaı-aq ShQO Bilim salasynda sapany qamtamasyz etý departamentiniń qyzmetkerleri ákimshilik isti qarady.

Tekserý barysynda senbilikke №43 mektebiniń pedagogterinen basqa №9 mektebiniń muǵalimderi de jiberilgeni anyqtaldy.

Ákimshilik isti qaraý barysynda pedagogter qalany abattandyrý jumystaryna Semeı qalasy ákiminiń orynbasary D.A. Garıkovtyń haty negizinde shyqqany anyqtaldy. Hatta pedagogterdiń senbilikke tańǵy saǵat 09.00-de shyǵýyn qamtamasyz etý tapsyrylǵan. Sondaı-aq hattyń ákim orynbasarynyń qoly qoıylǵan qosymshasyna sáıkes ár mektepke aýmaqty tazartý jumystaryn júrgizý úshin belgili bir ýchaske berilgen. Tapsyrmanyń oryndalýyn baqylaý ákimdiktegi bólimshelerdiń birine júktelgen.

«Bilim jáne ǵylym mınıstrligi oblystar men respýblıkalyq mańyzy bar qalalardyń ákimdikterine pedagogterdi paıdalaný jáne olardy qyzmetinen tys jumystarǵa tartý boıynsha osyndaı áreketterge jol berilmeýi tıis ekendigi týraly túsindirilgen hat joldady»,-delingen habarlamada.

Osyǵan deıin QR Bilim jáne ǵylym mınıstri Ashat Aımaǵambetov muǵalimderdi osyndaı jumysqa májbúrlegender jaýapqa tartylatynyn aıtqan bolatyn.

Keıinirek Semeı qalasy ákiminiń orynbasary atalǵan jaǵdaıǵa qatysty pikir bildirdi.



Joǵary qaraı