Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Semeıde azyq-túlik baǵasy qanshaǵa qymbattady

2021 jyldyń 14 qazan 2021 18:58

SEMEI. QazAqparat – Semeı qalasynda áleýmettik-mańyzy bar ónimderdiń baǵasyna kúndelikti monıtorıng júrgizilýde, dep habarlaıdy QazAqparat tilshisi.

Qalalyq kásipkerlik bólimi basshysynyń mindetin atqarýshy Ámına Syzdyqova baspasóz konferentsııasy barysynda qyrkúıek aıynan bastap áleýmettik-mańyzy bar azyq-túlikterdiń baǵasy turaqty ekendigin málimdedi.

«Osy kezeńde kartop – 4,6%-ǵa, sábiz – 10,7%-ǵa arzandady. Al qant – 1%-ǵa, taýyq jumyrtqasy – 1,1%-ǵa qymbattaǵan. Sońǵy apta ishinde 1 sanattaǵy taýyq jumyrtqasynyń quny 16,6%-ǵa ósti. Al qalǵan áleýmettik-mańyzy bar azyq-túlik taýarlarynyń 18 túrine baǵa turaqty», - dedi ol.

Onyń aıtýynsha, jumyrtqa baǵasynyń ósýi maýsymdyq bolyp otyr. Óıtkeni kúz ben qys mezgilderi aralyǵynda kúnniń qysqarýyna baılanysty taýyqtardyń jumyrtqalaýy tómendegen.

«Bul rette, shetelden ákelinetin jemniń, veterınarlyq preparattardyń, mıneraldy qospalar men janar-jaǵar maı baǵasynyń kóterilýin eskerý qajet. Naqty aıtqanda, bıyl jem eki esege, al dızel otyny bir jarym esege qymbattady. Qazirgi ýaqytta jergilikti taýar óndirýshi «Semei Qus» JShS-da jumyrtqanyń kóterme baǵasy – on danasyna 360-380 teńgeni quraıdy», - dedi Ámına Syzdyqova.

Al kórshiles Qaraǵandy, Aqmola, Pavlodar oblystarynan ákelinetin jumyrtqanyń baǵasy – 440-450 teńge. Maýsymaralyq kezeńde Semeı qalasynyń turaqtandyrý qoryna 3100 tonna kókónis ónimderi satyp alynǵan. Onyń ishinde kartop – 1500 tonna, qyryqqabat – 450 tonna, sábiz – 400 tonna, pııaz – 750 tonna.

Sonymen qatar Semeıde áleýmettik-mańyzy bar ónimderdiń baǵasyna kúndelikti monıtorıng júrgizilýde. Baǵanyń negizsiz ósýi baıqalǵan jaǵdaıda jedel tıisti sharalar qabyldanady.


Joǵary qaraı