Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Saýytbek Abdrahmanov: Elbasyna beriletin baǵanyń bireýi – óziniń saıası izbasaryn tárbıeleýi

2021 jyldyń 6 jeltoqsan 2021 15:00

NUR-SULTAN. QazAqparat - Parlament depýtaty, Májilistegi Qazaqstan halqy Assambleıasy depýtattyq tobynyń jetekshisi Saýytbek Abdrahmanov Elbasynyń búgin jarııalanǵan «Táýelsizdik taǵylymy» atty maqalasyna qatysty pikir bildirdi.

«Elbasymyz Nursultan Nazarbaev der shaǵynda, ulystyń uly toıynyń dál qarsańynda jarııalaǵan «Táýelsizdik taǵylymy» atty eńbeginde: «Biz atom qarýynan óz erkimizben bas tartyp, búkilálemdik ıadrolyq qarýsyzdaný kóshin bastadyq. Bul – Qazaqstannyń jahandyq beıbitshilikti saqtaýǵa qosqan teńdessiz úlesi» dep atap aıtqan, qadap kórsetken. Iá, Qazaqstannyń álemdegi beıbitshilik jolyndaǵy sherýdiń kóshin bastaǵanynyń ózine otyz jyl tolyp otyr. Ony otyz jyldan beri búkil álem bilip, laıyqty baǵalap otyr», - dep atap ótti qoǵam qaıratkeri.

Saýytbek Abdrahmanovtyń pikirinshe, b ul sózge dáleldi alystan izdeýdiń qajeti joq.

«Osydan eki kún buryn AQSh prezıdenti Djozef Baıdenniń Qazaqstan prezıdenti Qasym-Jomart Toqaevtyń atyna memleketimiz táýelsizdiginiń mereıtoıyna oraı joldaǵan quttyqtaýy jarııalandy. Onda: «Qazaqstannyń Ortalyq Azııada jáne búkil álemde beıbitshilik, turaqtylyq pen gúldenýdi saqtaý jolynda kósh bastap kele jatqanynyń 30 jyldyq mereıtoıy qarsańyndaǵy qýanyshyńyzǵa ortaqpyn» dep jazylǵan. Kim aıtsa da ońaı sóz emes. Álemdegi eń qýatty eldiń lıderi aıtsa, tipti salmaqty sóz. Al sodan, ıaǵnı Nursultan Nazarbaev qazaq jerindegi ajal aranyna óz qolymen qum quıyp, tajaldy tunshyqtyrǵannan nebári bes-aq jyl buryn biz qandaı el edik? Máskeý oıyndaǵysyn jasaıtyn, kadrlyq eksperıment ótkizip, topyraǵymyzǵa tabany tıip kórmegen kóldeneń kók attyny bizdi basqarýǵa jibere salatyn el emes pe edik? Sol eldiń etektegi basyn tórge shyǵaryp bergen eren erdiń keshe jarııa etilgen tolymdy tolǵaýy táýelsizdiktiń tar jol, taıǵaq keshýin áńgimeleýmen ǵana shektelmeıdi, egemendikke umtylýmen ótken halyqtyń eń qasıetti qundylyqty qandaılyq qasterleýge tıisti ekendigin de tebirene sóz etedi», - deıdi halyq qalaýlysy.

Onyń aıtýyna qaraǵanda, óz jerinde nebári qyryq paıyzdy qurap turǵan qazaqtyń sol syn saǵatta syr bermeýi, tek rýhy kúshti, birligi bekem jurt qana ala alatyn asýlardan asýy qasıetti kıemiz – táýelsizdikke sabyr men tózimdilik, aqyl men parasat arqyly qol jetkizýiniń arqasy ekendigin tarıhtyń tar kezeńin tamasha taldaı otyryp, túsindiredi.

«Biz táýelsizdikke beıbit jolmen qol jetkizsek te, oǵan barar jolda babalar qany az tógilgen joq. Táýelsizdik sol kıeli qannyń óteýi edi. Men munyń bárin biz sengen, tárbıelegen búgingi jas urpaq bilsin, sanasyna sińirsin dep ádeıi jazyp otyrmyn», deıdi Nursultan Nazarbaev. Búginginiń bári op-ońaı bola qalǵandaı, qazirgi bereke ózdiginen kele qalǵandaı, shekaramyz shıelenissiz bekitile qalǵandaı, elordamyz aıaq astynan ornaı qalǵandaı, san túrli ulttyń basy áp-sátte bir maqsatqa birige qalǵandaı kóretinder kóbeımese, azaımaı turǵan osyndaı shaqta osylaı aıtatyn kez de kelgen edi. Ár adamǵa beriletin baǵanyń bireýi óziniń ul-qyzynyń tárbıesi desek, ustazǵa beriletin baǵanyń bireýi shákirtiniń deńgeıi desek, el ustazy bolyp tabylatyn Elbasyna beriletin baǵanyń bireýi – óziniń saıası izbasaryn tárbıeleýi. Bul turǵydan biz Elbasymyzǵa Qasym-Jomart Toqaev syndy azamatty jas kúninen tamyrshydaı tanyp, osynsha jyldar boıy baýlyp, qanattandyryp, san qııaǵa salyp, bıikterge ushyryp, synaqtarǵa túsirip, túrli laýazymdy qyzmetter berip baıqap, osyndaı deńgeıge keltirgeni úshin razylyǵymyzdy bildiremiz. «Otyz jylǵa jýyq el basqarǵan kezimde men janyma qanshama azamatty serik etip, kóptegen shákirt tárbıeledim. Solardyń ishinde Úkimet basqarǵan, Birikken Ulttar Uıymy bas hatshysynyń orynbasary retinde jahandyq saıasatqa jetiktigin tanytqan, táýelsizdiktiń alǵashqy jyldarynan bastap qasymnan tabylǵan naǵyz patrıot, joǵary bilikti kásipqoı tulǵa Qasym-Jomart Kemeluly Toqaevty Prezıdenttik qyzmetke usyndym. Saılaýda halyqtyń basym kópshiligi ony qoldady. Osylaısha, biz halqymyzdyń aýyzbirligin, saıasattaǵy sabaqtastyǵymyzdy kúlli álem qoǵamdastyǵyna taǵy bir qyrynan tanyta bildik», deıdi Elbasy. Táýelsizdik toıy qarsańynda aıtylǵan bul sózder bizdiń barshamyzdyń keler kúnderge, kemel keleshekke senimimizdi arttyra túsedi «, -dep túıindeıdi sózin Májilis depýtaty Saýytbek Abdrahmanov .


Joǵary qaraı