Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Saýyqtyrý aıasynda 6,6 trln teńgege jýyq nashar nesıeler esepten shyǵaryldy - Prezıdent

2021 jyldyń 19 qarasha 2021 15:23

ALMATY. QazAqparat – Qarjy sektoryn saýyqtyrý aıasynda 6,6 trıllıon teńgege jýyq nashar nesıeler esepten shyǵaryldy. Bul týraly Almatyda qarjy sektorynyń ókilderimen kezdesken Prezıdent Qasym-Jomart Toqaev aıtty, dep habarlaıdy QazAqparat.

Kezdesýde Memleket basshysy qarjy sektorynyń turaqtylyǵyna toqtaldy. Sondaı-aq búginde qarjy sektorynyń dármensiz bankterden arylǵanyn, al saýyqtyrý aıasynda 6,6 trıllıon teńgege jýyq nashar nesıeler esepten shyǵarylǵanyn atap ótti. Qasym-Jomart Toqaevtyń aıtýynsha, óteý merzimi 90 kúnnen asqan qaryzdardyń deńgeıi bankterdegi nesıe portfeliniń 4,3 paıyzyn quraıdy. Bul – sońǵy 13 jyldaǵy eń tómengi kórsetkish. Prezıdent osydan qorytyndy shyǵaryp, jınaǵan tájirıbe negizinde jıi qaıtalanatyn táýekel-qaterlerdiń aldyn alý sharalaryn kúsheıtý qajet ekenine toqtaldy.

Prezıdenttiń aıtýynsha, bankter memlekettik qoldaýdyń arqasynda búginde ekonomıkany nesıeleý boıynsha zor áleýetke ıe bolyp otyr. Bank júıesindegi ótimdiligi joǵary aktıvterdiń kólemi – 12,2 trıllıon teńge.

«Bıyl turǵyndar suranysynyń belsendi túrde qalypqa kele bastaǵanyn baıqap otyrmyz. Tutynýshylyq nesıe 32,8 paıyzǵa artqan. Nesıe alýshylar 6,1 mıllıon adamǵa jetti. Bálkim, bul qalypty úderis. Alaıda azamattarymyzdyń qaryz júktemesine tıimdi baqylaý jasaý mańyzdy. Qazirgi ýaqytta 545 myń adamnyń qaryzyn óteý merziminiń kesheýildeýi 90 kúnnen asqan. Másele elimizdiń qarjy turaqtylyǵyna tóngen táýekel-qaterde ǵana emes. Bul kóptegen azamattarymyzdyń qarjy tapshylyǵymen betpe-bet kelgenin bildiredi. Bul áleýmettik jáne saıası turaqsyzdyqqa alyp kelýi múmkin», – dedi Prezıdent.


Joǵary qaraı