Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Rossııskaıa gazeta» basshysy: Oqyrmanǵa aıtatyn Qazaqstan týraly jaǵymdy jaıttar kóp

2021 jyldyń 6 jeltoqsan 2021 14:33

NUR-SULTAN. QazAqparat – «Rossııskaıa gazeta» basylymynyń bas dırektory Pavel Negoıtsa elimizde bolyp jatqan jaıttardy Reseı jurtyna aqparat retinde taratýǵa qatysty pikirin bildirdi, dep habarlaıdy QazAqparat tilshisi.

«Biz oqyrmandarymyzǵa qulaq asamyz. Kez kelgen redaktsııanyń áriptesterimen seriktes bolýyna múmkindigi bar. Biraq biz yntymaqtastyqty jasandy túrde qurǵymyz kelmeıdi. Osy sátten bastap qazaqstandyq áriptesterimiz Máskeýde seriktesi bar ekenin bilip, barlyq jaǵdaı boıynsha bizge júgine alady. Qazaqstandyq áriptester tarapynan da ózara túsinistiktiń ornaıtynyna senemin. Biz - qoǵamdyq-saıası basylymbyz. Biz saıasatty, áleýmettik saıasatty, sportty, mádenıetti jáne qoǵamdy qamtamyz. Bizde taqyryp boıynsha shekteý joq. Jáne bizdi postkeńestik keńistik pen Eýrazııa aýmaǵynda bolyp jatqan oqıǵalardyń barlyǵy qyzyqtyrady. Zaman kún sanap ózgerip jatyr, keıde kóz aldymyzda úlken ózgerister bolyp jatady. BAQ salasy da kóshten qalmaýy kerek», - dedi Pavel Negoıtsa.

«Egemen Qazaqstan» AQ men «Rossııskaıa gazeta» seriktestik týraly kelisimge qol qoıý barysynda ekijaqty sheberlik-synyptaryn ótkizý máselesi de qozǵaldy.

«Ózderińiz biletindeı, pandemııaǵa baılanysty kóptegen sharalar men mańyzdy jıyndar onlaın formatta ótip jatyr. Sondaı-aq, bilim alýda qashyqtan oqytý júıesine aýysqany belgili. Osy oraıda biz osyndaǵy áriptesterimizben materıal daıyndaý, áleýmettik jelimen jumys, kontent izdeý jáne ony taratý sekildi taqyryptarda birlesken tájirıbe almasý sharasyn uıymdastyrýǵa bolady. Sharany onlaın ótkizýge bolady. Sondyqtan biz ashyqpyz, bar tájirıbemizben bólisýge daıynbyz», - deıdi ol.

Sondaı-aq, reseılik basylymnyń basshysy Qazaqstanda qandaı taqyryptar men salalar qyzyqtyratynyn aıtyp berdi.

«Men Qazaqstanda kedeılikpen kúreste aýqymdy jumys istelip jatqany týraly maqala oqydym. Jalpy búginde kedeılik uǵymymen kúreste Qytaı aldyńǵy orynda. Bizde belgili sanattar bar. Biraq Qazaqstandy Reseımen salystyra bastaǵan kezde, sizder de biraz jumystyń jasalǵanyn baıqadyq. Oqyrmanǵa aıtatyn Qazaqstan týraly jaǵymdy jaıttar kóp. Qala qurylysy boıynsha da Qazaqstannyń tájirıbesi qyzyqty. Jáne halyqaralyq saıasat ol kún tártibinen túspeıtin taqyryptyń biri», - dedi P.Negoıtsa.

Buǵan deıin habarlaǵanymyzdaı, búgin elordada «Egemen Qazaqstan» AQ men «Rossııskaıa gazeta» seriktestik týraly kelisim jasasty.


Avtor Álı Ibraev
Basty sózder: BAQ, Reseı, Qoǵam,
Joǵary qaraı