Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Revmatoıdty artrıttiń durys emi qandaı

2021 jyldyń 28 qarasha 2021 15:47

ALMATY. QazAqparat- Revmatoıdty artrıtte sýyqtaý da, qyzdyrý da qaýipti. Bul týraly Kardıologııa jáne ishki aýrýlar ǴZI revmatolog dárigeri Marjan Abdýllaeva aıtty, dep habalaıdy QazAqparat tilshisi.

Dárigerdiń aıtýynsha, revmatoıdty artrıt – bul býyndardyń qabynýyn týdyratyn jáne jasyna, ómir súrý salty men jaı-kúıine qaramastan, kez kelgen adamnyń shaldyǵýy múmkin sozylmaly aýtoımmýndy aýrý. Polıartrıtpen kóbine orta jastaǵy (36-45 jas) áıelder aýyrady. Adam 50, 70 jáne 80 jasta da aýyrýy múmkin. Revmatoıdty artrıtpen balalar da (bir jastan 3 jasqa deıin) aýyrady, biraq eresekterge qaraǵanda jeńil túrinde.

«Barlyǵy jáı ǵana sýyq tııýden bastalady. Ádette, eń aldymen jalpy álsizdik, sharshaý sekildi belgiler paıda bolady. Osy belgilerge birte-birte bulshyqettiń aýyrýy, tersheńdik, dene qyzýynyń joǵarylaýy qosylady. Osydan keıin býyndar aýyra bastaıdy. Bul rette aýrý kez kelgen býyndy zaqymdaýy múmkin. Polıartrıt kezinde tyrnaqtardyń álsiz bolýy, skelet bulshyqetteriniń bosaýy, plevrıttiń damýy, ókpe tininiń zaqymdanýy sekildi belgiler paıda bolýy múmkin. Olardyń kóbisi revmatoıdty túıinderdiń paıda bolýymen ilesedi», - deıdi Kardıologııa jáne ishki aýrýlar ǴZI revmatolog dárigeri Marjan Abdýllaeva.

Polıartrıttiń basty belgisi – qol saýsaqtary býyndarynyń zaqymdanýy. Tek qana osy sımptomǵa súıene otyryp dıagnoz qoıýǵa bolady. Tize býynynyń aýyrýy kezinde dıagnoz qoıýǵa asyǵýǵa bolmaıdy, sebebi bul basqa aýrýlardyń da belgisi bolýy múmkin.

«Osy aýrýǵa tán ekinshi belgi – adam tańerteń oıanǵan kezde óz saýsaqtaryn qysa almaıtyndaı qımyldaı almaý sımptomy. Ókinishke oraı, álemdegi polıartrıttiń naqty sebepteri anyqtalmady. Vırýstyq ınfektsııa, stress, tońý nemese kerisinshe qatty qyzdyrynýdyń saldarynan ımmýndyq júıeniń durys jumys istemeýi belgili. Aýrýdyń maýsymdyq asqynýlary jáne aǵzanyń fızıologııalyq qaıta almasý kezeńi: jasóspirim jasta, áıeldiń bosanǵannan keıingi kezeńi men klımakstyń bastalýy arasyndaǵy baılanys baıqalady. Qalypty jaǵdaıda ımmýndyq júıeniń jasýshalary aǵzanyń óz tinderine zııan keltirmeı, vırýstyq ınfektsııaǵa jaýap beredi»,- deıdi dáriger.

Onyń aıtýynsha,zamanaýı medıtsınada polıartrıtti emdeý úshin bazıstik terapııany, ıaǵnı ımmýndyq júıe jasýshalarynyń antıdenelerdi shyǵarý belsendiligin tómendetetin em, bazıstik terapııa paıdalanylady. Osyndaı terapııa emdeýdiń alǵashqy kúninen bastap júrgiziledi jáne ómir boıy jalǵastyrady. Syrqat adamǵa únemi qabyldaıtyn preparattar taǵaıyndalady. Tek osyndaı jaǵdaıda ǵana aýrý ýaqyt óte kele basylyp, adamnyń ómir súrý sapasy jaqsy jaqqa ózgere bastaıdy. Emdeý syrqattyń belsendiligi men uzaqtyǵyna tikeleı baılanysty. Ár naýqasqa jeke emdeý kestesi tańdalady. Metotreksat, metodjekt emdeý ádisiniń altyn standarty bolyp tabylady. Olar kóp dozada qoldanylady jáne keri áserlerdi týdyrmaıdy. Preparattar aptasyna bir ret qana qoldanylady, bul rette aýrýdyń aǵymy baqylanyp otyrady. Densaýlyqtyń jaqsarǵany emdeý bastalǵannan 4-6 aıdan keıin ǵana paıda bolady.

«Sondyqtan bazıstik terapııamen birge aýyrsynýdy basý úshin jyldam áser etetin nesteroıdti qabynýǵa qarsy preparattarmen emdeý jáne keı jaǵdaıda glıýkokortıkosteroıdtar (aǵza shyǵaratyn tabıǵı steroıdti gormondarǵa uqsas zattar) qoldanylady. Bul terige meılinshe tereń sińetin jáne býynǵa áser etip qyzdyratyn gelder, maılar bolýy múmkin, biraq jaqsy áser alý úshin maıdy kúnine 3 ret paıdalanǵan jón. Nesteroıdty preparattar qabynýdy, aýyrý sezimderin azaıtady.

Adam densaýlyǵyna mıneraldy sýlar, emdik vannalar paıdaly áser etedi. Sondyqtan da eń aldymen statsıonarda emdelip, sodan keıin fızıoterapevtik em qabyldap (jarty jylda 1 ret), kún saıyn arnaıy emdik gımnastıka jasap jáne qımyl-tirek apparaty aýrýlaryn emdeıtin shıpajaıǵa jylyna bir ret barǵan durys»,- deıdi Marjan Abdýllaeva.


Avtor Alma Muqanova
Basty sózder: Medıtsına, Almaty,
Joǵary qaraı