Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Respýblıka sottary 10-11 qańtarda saılaý isteri boıynsha 2 ótinishti qarady - Joǵarǵy sot

2021 jyldyń 11 qańtar 2021 22:36

NUR-SULTAN. QazAqparat - Respýblıka sottary 10-11 qańtarda saılaý isteri boıynsha barlyǵy 2 ótinishti qarady. Bul týraly óziniń Facebook paraqshasynda QR Joǵarǵy sotynyń baspasóz hatshysy Aıdos Sádýaqasov málim etti, dep habarlaıdy QazAqparat.

Onyń aıtýynsha, respýblıka sottary 2021 jyldyń 10-11 qańtarynda ýchaskelik saılaý komıssııalarynyń (ÝSK) sheshimderi men áreketterine shaǵymdanýǵa qatysty 2 ótinishti máni boıynsha qarap, sheshim qabyldady. Eki isti de Almaty sottary qarady.

«Táýelsiz baıqaýshylar» qoǵamdyq birlestigi Medeý aýdandyq sotyna júgine otyryp, baqylaýshysyn tirkeýden bas tartqany jáne saılaý ýchaskesine kirýge ruqsat bermegeni úshin ÝSK-niń áreketin zańsyz dep tanýdy jáne baqylaýshy retinde tirkeýge mindetteýdi surady.

«Saılaý týraly» zań baqylaýshydan ókilettigin jazbasha rastaýdy talap etedi. Bul qujat baıqaýshynyń tegin, atyn, ákesiniń atyn kórsete otyryp usynǵan uıymnyń mórimen bekitilýi tıis. Buǵan qosa, baıqaýshy jeke kýáligin kórsetýge mindetti. Osy talaptardyń barlyǵyn baıqaýshy bolýǵa tilek bildirgen tulǵa oryndamaǵan. Sol sebepti sot qoǵamdyq birlestiktiń talaptaryn qanaǵattandyrýdan bas tartty.

Dál osyndaı ótinishpen №2 Almaly aýdandyq sotyna «Qazaqstannyń jastar aqparattyq qyzmeti» qoǵamdyq qorynyń ókilderi de júgindi. Onda qoǵamdyq qor óz ókiliniń saılaý ýchaskesiniń ǵımaratynda bos oryndardyń bolmaýyna baılanysty baqylaýshy retinde kirgizilmegendigin atap kórsetken. Qoǵamdyq qor sanıtarlyq talaptardy saqtaýǵa baılanysty siltemelerdi negizsiz dep eseptedi.

ÝSK ókili saılaý ýchaskesiniń ǵımaratyndaǵy baıqaýshylarǵa bólingen orynnyń bosaǵanyn kúte turý týraly ótinishti ony kirgizýden jáne tirkeýden bas tartý bolyp tabylmaıtyndyǵyn atap ótti.

Sot anyqtaǵandaı, ÝSK ǵımaratynda qoǵamdyq baıqaýshylarǵa bólingen oryndar sanıtarlyq normalar men COVID-19-dyń taralýynyń aldyn alý jónindegi algorıtmge sáıkes ornalastyrylǵan.

Ýchaskege kelgen sátte baıqaýshyǵa oryn usyný kezinde áleýmettik qashyqtyq normalaryn saqtaý múmkin bolmady.

«Halyqtyń densaýlyǵy jáne densaýlyq saqtaý júıesi týraly» kodeks talaptary men joǵaryda atalǵan algorıtmdi bekitý týraly Bas sanıtarlyq dáriger qaýlysynyń normalary mindetti túrde oryndalýy tıis. Osyǵan baılanysty sot qoǵamdyq qordyń talabyn oryndaýdan bas tartty. Ótinishterdiń birqatary ótinish berýshilerdiń zań talaptaryn saqtamaýyna oraı keri qaıtaryldy. Atap aıtqanda, olarda ÝSK-ge qoıylatyn naqty talaptar men zańnyń qandaı normalary buzylǵany kórsetilmegen»,-delingen Joǵarǵy Sot janyndaǵy Sottardyń qyzmetin qamtamasyz etý departamentiniń málimetteri negizinde qaldyrylǵan habarlamada.


Joǵary qaraı