Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Qazaqstan telearnasy túsirgen 6 tarıhı serıaldyń tanystyrylymy ótti

2021 jyldyń 2 jeltoqsan 2021 19:18

NUR-SULTAN. QazAqparat – Kazmedia ortalyǵynda Qazaqstan telearnasy túsirgen 6 tarıhı serıaldyń tanystyrylymy ótti, dep habarlaıdy QazAqparat tilshisi.

Táýelsizdiktiń 30 jyldyǵy qarsańynda Qazaqstan telearnasy kınosúıer qaýymǵa erekshe syı jasamaq.

Sonyń aıasynda «Jáńgir han. Saraı syry», «Ahmet. Ult ustazy», «Domalaq ana», «Táshenev. Taıtalas», «Qanysh. Qazyna», «Muqaǵalı. Bul ǵasyrdan emespin» tarıhı telehıkaıalarynyń tanystyrylymy ótti.

Aıtýly sharaǵa QR Premer-Mınıstriniń orynbasary Eraly Toǵjanov, QR Aqparat jáne qoǵamdyq damý mınıstri Aıda Balaeva, QR Parlamenti Májilisiniń depýtattary, kıno jáne jýrnalıstıka salasynyń ókilderi qatysty.




Tanystyrylym aldynda sóz alǵan Úkimet basshysynyń orynbasary Eraly Toǵjanov tarıhı seraıldardyń Táýelsizdik toıynyń qarsańynda kórermenge jol tartqanyn eske saldy.

«Táýelsizdiktiń 30 jylynda qazaqtyń rýhynyń da, namysynyń da, tiliniń de, diliniń de óskenin álem kórdi. Búgin tusaýy kesilip otyrǵan týyndylar osy Táýelsizdiktiń bir úlken nátıjesi dep aıtsam artyq emes qoı dep oılaımyn. Syrttan alynǵan eshteńe joq bul jerde. Bul – bizdiń naqty ómirimiz. Bul – bizdiń naqty tarıhymyz. Qazaq balasynyń basynan ótken qıyn kezeńder de sıpattalǵanyn ózderińiz baıqap otyrsyzdar. Mysaly «Táshenev. Taıtalas» fılminiń astarynda qandaı saıası másele jatqanyn bárińiz jaqsy bilesizder. Ony halyq ta biledi. Biraq sony jetkizip aıtýymyz kerek. Tarıhı serıaldarǵa basymdyq berilýi tegin emes. XVII ǵasyrdaǵy, XIX ǵasyrdaǵy qazaq dalasynyń, qazaq balasynyń basyna túken kúrdeli kezeńderde jol taýyp, eldi alǵa súıregen azamattardyń tulǵasyn ashyp kórsetý – úgingi býynnyń paryzy», - degen vıtse-premer Qazaqstan telearnasynyń ujymy men QR Aqparat jáne qoǵamdyq damý mınıstrligine alǵys bildirdi.




«Bizdiń Aqparat mınıstrligi keremet jumys jasady dep oılaımyn. Táýelsizdigimizdiń 30 jyldyǵynyń aldynda osyndaı qundy dúnıelerdi halyqtyń aldyna shyǵaryp, elimizge kórsete alsaq, halyqtyń júregine jete alsaq, úlken jeńis qoı dep oılaımyn. Sol jolda úlken qadam jasaldy. Ár túrli oılar, pikirler bolýy múmkin. Degenmen halyqtyń oıy bir jerden shyǵatynyna senemin. Nege deseńizder, naqty tarıhı sátterimizdi shamamyz kelgenshe elge jetkizýge mindettimiz. Solaı bolatynyn meniń eshqandaı kúmánim joq. Kórermender de óz baǵasyn bere jatar», - dedi Eraly Toǵjanov.































Joǵary qaraı