Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prokýratýra ókili Eljan Birtanovty úıqamaqta ustaý merzimin uzartýdy surady

2021 jyldyń 5 mamyr 2021 19:07

NUR-SULTAN. QazAqparat – Nur-Sultan qalasynyń mamandandyrylǵan aýdanaralyq tergeý soty burynǵy densaýlyq saqtaý mınıstri Eljan Birtanovty úıqamaqta ustaý merzimin uzartý týraly tergeý organynyń ótinishin qarady, dep habarlaıdy QazAqparat tilshisi.

Sot otyrysyna qorǵaýshy tarap retinde advokattar Serik Saǵalıev, Dmıtrıı Kýrıachenko, Nurlan Beısekeev jáne aıyptalýshy Eljan Birtanovtyń ózi qatysty.

Eljan Birtanovty úıqamaqta ustaý merzimin uzartý týraly ótinishti Bas prokýratýra ókili Tólegen Jaraspaev jetkizdi. Prokýratýra ókili óz sózinde úıqamaqta ustaý merzimin taǵy bir aıǵa – 2021 jyldyń 14 maýsymyna deıin uzartýdy, E.Birtanovqa medıtsınalyq mekemelerden basqa nysandarǵa úıden shyǵýǵa ruqsat bermeýdi surady.

Prokýratýra ókiliniń aıtýynsha, sotqa deıingi tergep-tekserý kezinde Densaýlyq saqtaý mınıstrligi 2015 jyly horvatııalyq Ericsson Nikola Tesla fırmasymen «Densaýlyq saqtaý salasynyń aqparattyq júıelerin aqparattandyrý jáne birizdendirý platformasy» atty avtomattandyrylǵan aqparattyq júıeni 17,8 mln AQSh dollaryna jetkizý týraly kelisimshart bekitkeni belgili bolǵan. Ol júıe 2018 jyly Nur-Sultan qalasyndaǵy, Batys jáne Shyǵys Qazaqstan oblystaryndaǵy 17 emdeý mekemesinde pılottyq paıdalanýdan ótip baryp, respýblıka boıynsha engizilýi kerek bolǵan.

Tergeý derekterinde «atalǵan platforma paıdalanylyp jatqan joq», «Densaýlyq saqtaý mınıstrliginiń aqparattyq júıelerimen ıntegratsııalanbaǵan», «bul pandemııa kezinde densaýlyq saqtaý organdarynyń jumysyna teris áser etti» degen qorytyndy usynylǵan.

Eks-mınıstrdiń úıqamaq merzimi 14 mamyr kúni aıaqtalýy kerek bolǵan. Qorǵaýshy taraptan sóz alǵan advokattardyń iske qatysty derekteriniń moldyǵyn eskergen sýdıa Aıbek Ábý sot otyrysyn erteń, 6 mamyrda jalǵastyrý týraly sheshim shyǵardy.

Burynǵy densaýlyq saqtaý mınıstri Eljan Birtanov byltyr maýsym aıynda qyzmetinen bosatylǵan bolatyn. Al kúzde eks-mınıstr bıýdjet qarajatyn ysyrap etti degen kúdikpen qamaýǵa alynǵan.

Eske salsaq, ótken aıda Nur-Sultan qalasynyń mamandandyrylǵan aýdanaralyq tergeý soty burynǵy mınıstr Eljan Birtanovty úıqamaqta ustaý merzimin uzartyp, biraq úıden shyǵýǵa ruqsat bergen edi.

Densaýlyq saqtaý mınıstri Alekseı Tsoı brıfınginiń birinde burynǵy mınıstrdiń sot bergen múmkindikti paıdalanyp, kommertsııalyq qurylymda jumys istep júrgenin málim etken.


Joǵary qaraı