Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent Mańǵystaý jáne Qyzylorda oblystary ákimderiniń esebin tyńdady

2021 jyldyń 21 shilde 2021 17:39

NUR-SULTAN. QazAqparat - Memleket basshysy Qasym-Jomart Toqaev Mańǵystaý jáne Qyzylorda oblystarynyń ákimderimen óńirlerdegi qazirgi sanıtarlyq-epıdemıologııalyq jáne áleýmettik-ekonomıkalyq ahýaldy telefon arqyly talqylady Bul týraly QR Prezıdentiniń baspasóz hatshysy Berik Ýálı Facebook-te jazdy, dep habarlaıdy QazAqparat.

Mańǵystaý oblysynyń ákimi Serikbaı Trumov Prezıdentke COVID-19 indetine qarsy kúres boıynsha qabyldanyp jatqan sharalar, sonyń ishinde, halyqqa ekpe egý jáne maldy jem-shóppen qamtamasyz etý máseleleri jóninde baıandady.

Memleket basshysy oblys turǵyndaryna ekpe salý qarqynyn arttyrý jónindegi jumystardy kúsheıtýdi, sondaı-aq, eńbek daýlaryn retteý jáne boldyrmaý, óndiris oryndary men munaı kásiporyndaryna qyzmet kórsetetin mekeme jumysshylaryna áleýmettik qolaıly jaǵdaıdy qamtamasyz etý sharalaryn qabyldaýdy tapsyrdy.

Sonymen qatar Prezıdent Úkimetke ákimdikpen birlesip, qýańshylyq saldaryna jáne jaıylymdyq jerlerdegi shóptiń tapshylyǵyna baılanysty qalyptasqan jaǵdaı boıynsha fermerler men aýyl turǵyndaryn qoldaý úshin qajetti sharalar qabyldaýdy tapsyrdy.

Qyzylorda oblysynyń ákimi Gúlshara Ábdiqalyqova Memleket basshysyna koronavırýs indetimen kúreste júrgizilip jatqan jumystar týraly esep berdi. Óńirdegi vaktsına saldyrýǵa tıisti turǵyndardyń 52 paıyzy ekpe aldy.

Sonymen qatar oblys ákimi aımaqtaǵy sý sharýashylyǵyna qatysty jaǵdaıdy da baıandady. Búginde Syrdarııa ózeni arqyly oblysqa sekýndyna 550 tekshe metr sý kelýde. Sharýashylyq sýbektilerine sý berý kezegi men onyń kólemin anyqtaıtyn jumys komıssııasy quryldy.

Oblys ákiminiń aıtýynsha, Aral aýdanynda 12 shildede tótenshe jaǵdaı jarııalanǵan. Osyǵan baılanysty Úkimet rezervinen jáne oblystyq bıýdjetten jem-shóp sýbsıdııasyna, sondaı-aq, sý arnalaryn tazartýǵa jáne uńǵymalar qazýǵa qarjy bólý týraly sheshim qabyldanǵan.

Memleket basshysy Qyzylorda oblysynyń ákimine halyqty vaktsınalaýǵa qatysty aqparattyq-túsindirý jumystaryn kúsheıtýdi, munaı-gaz salasyndaǵy problemalardy sheshý úshin keshendi amal qarastyrýdy, sondaı-aq, Qyzylorda oblysyna qarasty aýdandardaǵy zardap shekken sharýashylyq sýbektilerine jem-shóp daıyndaýdy qamtamasyz etýdi tapsyrdy.


Joǵary qaraı