Prezıdent Básekelestikti qorǵaý jáne damytý agenttiginiń tóraǵasyn qabyldady

NUR-SULTAN. QazAqparat - Prezıdent Qasym-Jomart Toqaev Básekelestikti qorǵaý jáne damytý agenttiginiń tóraǵasy Serik Jumanǵarındi qabyldady, dep habarlaıdy Aqordanyń baspasóz qyzmeti.

Memleket basshysyna agenttik qurylǵannan beri atqarylǵan jumystar jaıynda baıandaldy. Serik Jumanǵarın vedomstvonyń ashyqtyq saıasatyn júzege asyryp jatqanyn, problemalyq máselelerdi qoǵam jáne bıznes ókilderimen birlesip talqylaýǵa múmkindik beretin kraýdsorsıngtik alańdar men kedergiler jónindegi keńesterdiń qurylǵanyn aıtty.

Qasym-Jomart Toqaevqa PTR synamasynyń, jeke qorǵanys zattarynyń, sondaı-aq, Qazaqstan áýejaılaryndaǵy tutyný taýarlarynyń baǵasyn tómendetý jóninde bergen tapsyrmalarynyń oryndalýy jaıynda málimet berildi.

Budan bólek Memleket basshysyna Básekelestikti qorǵaý jáne damytý agenttiginiń saýda bırjalarynyń qyzmetine, suıytylǵan gaz baǵasyn arzandatýǵa, naryqtaǵy dári-dármektiń baǵasyn turaqtandyrýǵa qatysty jasalǵan jumystar týraly aıtyldy.

Qazaqstan Prezıdenti PTR synamasynyń, jeke qorǵanys zattarynyń jáne dári-dármek baǵasyn aıyryqsha baqylaýda ustaýdy tapsyrdy.

Qasym-Jomart Toqaev Agenttik basshysyna ekonomıkanyń tıimdiligin arttyrýǵa, taýar bırjasy men básekelestikti odan ári damytýǵa qatysty birqatar mindettemeler júktedi.