Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Prezıdent aýyl ákimderin saılaýǵa qatysty pikir bildirdi

2021 jyldyń 25 aqpan 2021 13:13

NUR-SULTAN. QazAqparat – Aýyl ákimderin saılaý bıyl tamyz-jeltoqsan aralyǵynda ótedi. Bul týraly Ulttyq qoǵamdyq senim keńesiniń besinshi otyrysynda QR Prezıdenti Qasym-Jomart Toqaev málim etti, dep habarlaıdy QazAqparat tilshisi.

«Taǵy bir mańyzdy másele – ózin-ózi basqarý tájirıbesin damytý jáne jergilikti deńgeıdegi saılaý ınstıtýtyn nyǵaıtý. Aýylda, aýdanda turatyn árbir jan óziniń jáne otbasynyń bolashaǵyna ózi jaýapty ekenin sezinýge tıis. Olardyń pikiri barynsha eskerilýi kerek. Men byltyrǵy Joldaýymda Úkimetke Jergilikti ózin-ózi basqarýdy damytýdyń jańa tujyrymdamasyn ázirleýdi tapsyrdym. Tıisti jumystar atqarylýda. Bul qujattyń jobasyn Reformalar jónindegi joǵary keńes aldaǵy ýaqytta qaraıtyn bolady. Al, ekinshi jartyjyldyqta máseleni keıinge ysyrmaı, tıisti zań jobasyn daıyndaýǵa kirisý kerek», - dedi Memleket basshysy.

Prezıdenttiń aıtýynsha, strategııalyq mańyzy bar osy qujattarda búgingi ahýaldyń erekshelikteri eskerilýi tıis.

«Qazir biz kentterdiń, aýyldar men aýyldyq okrýgterdiń ákimderin tikeleı saılaýǵa daıyndalyp jatyrmyz. Saılaý bıyl shamamen tamyz-jeltoqsan aılary arasynda ótedi. Osy jyly 786 aýyl ákiminiń ókilettigi aıaqtalady. ıAǵnı, 800 jýyq eldi mekendi qamtıtyn jergilikti saılaý naýqany ótedi. Bul elimizdiń qoǵamdyq-saıası ómirindegi eleýli oqıǵa bolmaq», - dedi Q. Toqaev.

Budan buryn habarlanǵandaı, Prezıdent aýdan ákimderiniń tikeleı saılaý 2024 jyly ótkizý kerek dep sanaıtynyn aıtty.

«Kelesi mańyzdy qadam – aýdan ákimderiniń tikeleı saılaýy. Men bul saılaýdy 2024 jyly ótkizý kerek dep sanaımyn. Osy bastama elimizdi demokratııalandyrýǵa jáne jergilikti basqarý ınstıtýtyn nyǵaıtýǵa eleýli úles qosady dep senemin», - dedi Memleket basshysy.

Eske salsaq, Ulttyq keńestiń besinshi otyrysy ótip jatyr. Ulttyq qoǵamdyq senim keńesi quramynda rotatsııa jasaldy. Jańartylǵan Májilis quramynda Ulttyq keńestiń 9 múshesi bar. _Ótken jyly 22 qazanda QR Prezıdenti Qasym-Jomart Toqaevtyń qatysýymen Ulttyq qoǵamdyq senim keńesiniń tórtinshi otyrysy, al 2019 jyly 6 qyrkúıekte alǵashqy otyrysy boldy.
Joǵary qaraı