Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Prezıdent Almatyda jedel shtabtyń otyrysyn ótkizdi

2022 jyldyń 12 qańtar 2022 16:51

ALMATY. QazAqparat - Memleket basshysynyń tóraǵalyǵymen jedel shtab otyrysy ótti. Onda Úkimettik komıssııanyń tóraǵasy, Premer-Mınıstrdiń birinshi orynbasary Roman Sklıar, Almaty qalasynyń ákimi Baqytjan Saǵyntaev, Ulttyq qaýipsizdik komıtetiniń tóraǵasy Ermek Saǵymbaev jáne Іshki ister, Qorǵanys, Tótenshe jaǵdaılar mınıstrleri baıandama jasady, dep habarlaıdy Aqorda.

Prezıdentke Almaty qalasyna qosymsha kúshter, sonyń ishinde UQShU bitimgerlik kontıngentiniń kúshterin jumyldyrýǵa qatysty bergen tapsyrmasynyń nátıjesinde qala lańkesterden tolyq tazartylǵany týraly baıandaldy.

Qazirgi ýaqytta qala tirshiligin qamtamasyz etetin barlyq salanyń jumysyn qalpyna keltirý belsendi júrip jatyr.







Qala ákimi Baqytjan Saǵyntaevtyń habarlaýynsha, qalany jylý, elektr qýaty, sý jáne gazben qamtamasyz etetin barlyq nysan qalypty jumys istep jatyr. Saýda ortalyqtary, qoǵamdyq tamaqtaný oryndary, bazarlar, janarmaı beketteri jáne ónerkásip oryndary jumystaryn jandandyrýda, qoǵamdyq kólik iske qosylǵan.

Qasym-Jomart Toqaevqa zardap shekken ákimshilik ǵımaratynda 14 qalalyq basqarma bolǵany, qazirgi ýaqytta olardyń rezervtik ǵımarattarǵa, sondaı-aq ákimshilikke qarasty uıymdarǵa ornalastyrylǵany jóninde aqparat berildi.




Budan bólek tártipsizdik kezinde keltirilgen shyǵyn kólemin anyqtaý jumystary júrgizilýde.

Memleket basshysy elimizdiń iri qalasyna jasalǵan terrorıstik shabýyl saldaryn óz kózimen kórý úshin Almatyǵa arnaıy kelgenin aıtty.




Prezıdent Úkimettik komıssııaǵa Almaty qalasynyń ákimdigimen birlese otyryp, ınfraqurylym nysandaryn, onyń ishinde memlekettik, quqyq qorǵaý jáne arnaýly qurylymdardyń ǵımarattaryn, beınebaqylaý júıesin qysqa merzim ishinde qalpyna keltirýdi tapsyrdy.

Sonymen qatar zardap shekken kásipkerlerge qoldaý kórsetiledi.

– Ózderińizge málim, Almaty – meniń týǵan qalam. Osynda dúnıege keldim, oqydym. Aldymyzda qysqa merzim ishinde qalany qalpyna keltirý mindeti tur. Bul – meniń Prezıdent retinde jáne elimizdiń azamaty retinde paryzym. Qalanyń qalpyna keletinine esh kúmán joq. Úkimettiń aldynda qalanyń kelbetin burynǵydan da jaqsartý mindeti tur. Bul óte úlken jumys, – dedi Qasym-Jomart Toqaev.

Memleket basshysy alda UQShU birlesken bitimgerlik kontıngentiniń bólimshelerin qaıtarý jumystary júrgiziletinin aıtty.

– Erteń UQShU birlesken bitimgerlik kontıngentin elden shyǵarý jumystary bastalady. Men tıisti memleketterdiń basshylarymen sóılestim. Osy sátti paıdalanyp, osy birneshe kúnde júrgizgen aýqymdy jumystary úshin kontıngenttiń basshylyǵyna alǵys aıtamyn. UQShU bitimgerlik kontıngentiniń Qazaqstanǵa, sonyń ishinde Almatyǵa kelgeni jalpy elimizdegi jaǵdaıdy turaqtandyrýda úlken ról atqardy. Bul áreketterdiń lańkester men sodyrlardyń agressııasyn qaıtarýda úlken psıhologııalyq mańyzy bolǵany sózsiz. Mıssııa óte sátti ótti. Meniń áriptesterime Uıymǵa múshe elderdiń basshylaryna úlken alǵys bildiremin, – dedi Prezıdent.




Jedel shtaby otyrysynyń qorytyndysy boıynsha Úkimettik komıssııa men jergilikti ákimdikter birlesip qysqa merzim ishinde barlyq aımaqtaǵy nysandardy qalpyna keltirýge, úzdiksiz transport jumysyn qamtamasyz etýge, azyq-túlikpen qamtamazy etýge, sondaı-aq shaǵyn jáne orta bıznes nysandarynyń jumysyn jandandyrýǵa kúsh salý tapsyryldy.





Joǵary qaraı