Aýa raıy
Astana -18 °S
Almaty -4 °S
valıýta baǵamy
USD 421.58
EUR 496.83
RUB 5.53
CNY 62.20

Prezıdent Almatyda aǵashtardy kesken kinálilerdi jaýapkershilikke tartýdy tapsyrdy

2020 jyldyń 24 qarasha 2020 11:31

NUR-SULTAN. QazAqparat - Prezıdent Qasym-Jomart Toqaev Almaty qalasy Tóle bı kóshesindegi aǵashtardyń otalǵanyna qatysty jaǵdaıǵa nazar aýdardy, dep habarlaıdy QazAqparat.

Bul týraly QR Prezıdentiniń baspasóz hatshysy Berik Ýálı Facebook-tegi paraqshasynda jazdy.

«Prezıdent Qasym-Jomart Toqaev Almaty qalasy Tóle bı kóshesindegi aǵashtardyń otalǵanyna qatysty jaǵdaıǵa nazar aýdardy. Almaty qalasynyń ákimi Baqytjan Saǵyntaevqa atalǵan jaǵdaıǵa baılanysty qyzmettik terkserý júrgizip, kinálilerdi jaýapkershilikke tartýdy tapsyrdy.

Memleket basshysy 2019 jyly 29 qazanda Almatyda qala problemalaryna arnalǵan keńeste sóılegen sózinde megapolıstiń ekojúıesine uqypty qaraýdyń, shahar turǵyndarynyń jaıly ómir súrýin qamtamasyz etý úshin tıisti jaǵdaılar jasaýdyń erekshe mańyzdy ekenin málim etken bolatyn», delingen habarlamada.

Eske sala ketsek, 23 qarashada túnde Almatyda saýda úıiniń janyndaǵy jaıqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.

«Qazir aýdan ákimdigi men Polıtsııa Departamenti kesilgen aǵashtardyń tuqymy men sapasyn anyqtaý úshin oqıǵa ornynda jumys istep jatyr. Aıypty tulǵalar anyqtalǵan soń Polıtsııa Departamenti olardy jaýapkershilikke tartady. Tolyǵyraq aqparatty anyqtaý jumystary aıaqtalǵan soń jarııalaımyz», - dep málim etti qala ákimdigi.

Keıin Almaty qalalyq Jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.



Joǵary qaraı