Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Polıtsııa Týrızm Akademııasy prezıdentiniń kabınetinde túsirilgen fotony tekserip jatyr

2021 jyldyń 21 qańtar 2021 12:32

ALMATY. QazAqparat – Almaty polıtsııasy QR Sport jáne týrızm akademııasynyń prezıdenti Qaırat Zakırıanovtyń kabınetinde túsken sýretti tekserip jatyr, dep habarlaıdy QazAqparat tilshisi.

Áleýmettik jelide taralǵan sýrette kabınette qar barysynyń, ilbistiń, taǵy basqa janýarlardyń terileri anyq kórinedi. Bul sýretti Instagram jelisinde kásibı boksshy Janqosh Turarov jarııalaǵan. Keıin jazba óshirildi.

Qyzyl kitapqa engen janýarlar terisiniń sýreti kópshiliktiń narazylyǵyn týdyrdy.

Qazir bul derekke baılanysty QR Ekologııa, geologııa jáne tabıǵı resýrstar mınıstrligi men Almaty polıtsııasy tekserýdi bastady.

QR Ekologııa mınıstrligi osy máselege baılanysty túsinik berdi.

«Bizdiń mindetimiz – Qyzyl kitapqa engen janýarlardy turmystyq maqsatta qoldaný emes, kerisinshe olardy qorǵaý, olardyń popýlıatsııasyn saqtap qalý. Bul sýrette qar barysy, ilbis, arystannyń tulyby túsken. Sýrettegi qar barysynyń terisine qatysty Orman sharýashylyǵy jáne janýarlar álemi komıtetiniń Almaty oblystyq terrıtorıaldyq ınspektsııasy quqyq qorǵaý organdaryna shaǵymdanyp, tıisti shara qoldanatyn bolady. Bul máseleni baqylaýǵa alyp, azamattardyń nazarynda ustaıtyn bolamyz. Qar barysy Qazaqstannyń Qyzyl kitabyna engen. Ony aýlaýǵa qatań tyıym salynǵan», - dedi mınıstrliktiń baspasóz hatshysy Samal Ibraeva.

Onyń aıtýynsha, terrıtorııalyq ınspektsııa bul sýretterdi tekserip, 2021 jyly 20 qańtarda № 03-10/86 hatpen Polıtsııa departamentine joldaǵan.

Joıylyp ketý aldynda turǵan sırek kezdesetin janýarlardy, olardyń bólshekterin, derıvattaryn zańsyz paıdalanýǵa qatysty másele QR QK 339-babynda qarastyrylǵan. Polıtsııa óz kezeginde sýrettegi terilerdiń qar barysyna tıesili ekenin anyqtaıdy.

Tekserý qorytyndysyna sáıkes QR zańnamasyna oraı jaza qoldanylady.


Joǵary qaraı