Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Petropavlda turǵyndar páterdi jóndeý kezinde tapansha taýyp aldy

2021 jyldyń 22 qyrkúıek 2021 09:31

PETROPAVL. QazAqparat – Petropavlda turǵyndar satyp alǵan páterge jóndeý júrgizý barysynda paketke oralǵan gaz tapanshany taýyp aldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, óńirde «Ýchaske» jedel-profılaktıkalyq is-sharasy ótip jatyr, ýchaskelik polıtsııa ınspektorlary 1 qyrkúıekten beri 1700 asa mekenjaıdy, onyń ishinde sotty bolǵandardy, janjalqoılardy, turmysy tómen otbasylardy jáne basqa da esepte turǵandardy tekserip shyqty.

Operatsııanyń 20 kúni ishinde tártip saqshylary saǵat 23.00-den keıin zańdy ókilsiz úıden tys jerde júrgen 110 jasóspirimdi anyqtady. Bala tárbıesine nemquraılyq tanytqan 66 ata-ana jaýapkershilikke tartyldy.




Eńbekti zańsyz paıdalanýǵa jol bermes úshin oblystyń barlyq polıtseıleri sharýa qojalyqtaryn, qystaqtardy jáne aǵash kesetin oryndardy tekserip jatyr. Oblysta olardyń sany 2800-den asady, qazirgi ýaqytta 500-den astamy tekserildi. Іs-shara bastalǵaly turaqty meken jaıy joq 12 qańǵybas qabyldaý-taratý ornyna ornalastyryldy. Jumys barysynda jalǵa alynǵan páterler, qarý ıeleri de tekseriledi.

Osyndaı tekseriste júrgen polıtsııa qyzmetkerleri Petropavldaǵy Bóketov kóshesindegi kóp qabatty úıden túsken shaqyrtýǵa bardy. Jýyrda páter satyp alǵan otbasy qol jýatynnyń astynan tapansha salynǵan paket taýyp alǵan. Tártip saqshylary erikti túrde tapsyrý aktisin toltyrdy. Gazdy tapansha saraptamaǵa jiberildi.







«1 qyrkúıekten bastap 1300-den astam túrli quqyq buzýshylyq anyqtaldy. Jartysyna jýyǵy alkogolge qarsy zańnamany buzýmen baılanysty. Bul negizinen ishimdik ishý men qoǵamdyq oryndarda mas kúıde júrý. Zańsyz saýda faktileri de kezdesedi, mysaly, Qyzyljar aýdanynda aýyldyq dúkenderdiń biriniń ıesi alkogoldi tıisti lıtsenzııasyz satqany úshin jaýapkershilikke tartyldy, 65 lıtr túrli alkogoldik ónim tárkilendi. Sonymen qatar, oblysta otbasy-turmystyq qatynastar salasynda 126 zań buzýshylyq, usaq buzaqylyqtyń 120 faktisi tirkeldi. «Ýchaske» jedel-profılaktıkalyq is-sharasy 1 jeltoqsanǵa deıin jalǵasady», - deıdi SQO polıtsııa departamenti bastyǵynyń birinshi orynbasary Qanat Aıtbaev.


Joǵary qaraı