Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Petropavlda qanttyń kelisi 750 teńgeden joǵary satylyp jatyr

2022 jyldyń 26 mamyr 2022 17:42

PETROPAVL. QazAqparat – Soltústik Qazaqstan oblysynda qant taǵy da qymbattady. Ótken aptada erkin satylymda kelisi 540-580 teńgeden saýdalanǵan ónim birer kúnde birden shamamen 200 teńgege qymbattady, dep habarlaıdy QazAqparat tilshisi.

Petropavldaǵy kóterme saýda bazaryndaǵy satýshylardyń aıtýynsha, ótken aptada qant bazar sórelerinen 3-4 kúnge joǵalyp ketken. Osy aptanyń basynan ony eń arzan degende 750 teńgeden saýdalap jatyr. Ónim birden 200 teńgege qymbattaǵan.

«Baǵany turaqtandyrý maqsatynda iri saýda oryndaryna, bazarlarǵa qanttyń táýliktik normasy jetkizilip jatyr. Budan bólek, kommertsııalyq qant basqa saýda oryndarynda da jetkilikti. Al kondıterlik kásiporyndarǵa úsh fırma qanttyń kelisin 485 teńgeden ótkizip jatyr.

Jalpy bıyl biz 816 tonna – 12 vagon qant satyp aldyq. Qazir turaqtandyrý qoryndaǵy byltyr alynǵan qant satylyp jatyr. Sáýir aıynda «Azyq túlik korporatsııasy» UK» AQ arqyly qosymsha 136 tonna satyp alyndy», - deıdi SQO kásipkerlik jáne ındýstrıaldy-ınnovatsııalyq damý basqarmasynyń bólim basshysy Lázzat Ǵaleeva.

Mamandardyń aıtýynsha, qazirgi ýaqytta turaqtandyrý qorynda 406 tonna qant bar.

«Turaqtandyrý qoryndaǵy qant Áleýmettik-kásipkerlik korporatsııasynyń saýda oryndaryna, iri saýda jelilerine, sýpermarketterge, saýda úılerine jetkiziledi. Bazarlarda ǵana bizdiń 6 saýda ornymyz bar. Bul jerlerde baǵasy – 330 teńge. Saýda oryndary ústinen 20 teńge qosyp sata alady. Tek bir ǵana iri saýda jelisi arqyly aptasyna 12 tonna qant satylady», - deıdi «Soltústik» ÁKK UK AQ basqarma tóraǵasynyń orynbasary Ǵamalı Jumashov.

Turaqtandyrý qoryndaǵy qant kúzge deıin ǵana jetedi, sol sebepti qazir Kóksý qant zaýytymen kelissóz júrgizilip jatyr.

«Zaýyttar da qanttyń baǵasyn kóterip jiberdi. Mysaly Kóksý qant zaýyty bizge qanttyń kelisin 430 teńgeden usynyp otyr. Biz ázirge ol baǵany qymbatsynyp, kelisimge kelgen joqpyz», - deıdi Ǵamalı Jumashov.

Mamandardyń sózinshe, qazirgi ýaqytta Úkimette qazaqstandyq zaýyttardyń qant óndirisin arttyrý máselesi qaralyp jatyr.


Joǵary qaraı