Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Petropavl áskerı ınstıtýtyn bıyl Tájikstan, Qyrǵyzstan azamattary da bitirip shyqty

2021 jyldyń 19 maýsym 2021 18:58

PETROPAVL. QazAqparat – QR Ulttyq ulanynyń Petropavl áskerı ınstıtýty 21-inshi ret túlekterin shyǵardy. Bıyl oqý orny 205 jas ofıtserge dıplom berdi, - dep habarlaıdy QazAqparat tilshisi.

QR UU Petropavl áskerı ınstıtýty baspasóz qyzmetiniń málimetinshe, joǵary áskerı oqý ornyn bitirgen 205 túlektiń jeteýi Qyrǵyz Respýblıkasynan jáne segizi Tájikstan Respýblıkasynan. Oqýdy úzdik aıaqtaǵan on jas ofıtserdiń tórteýi - Arman Kenishbek, Nursultan Súttibaı, Islam Ahmetjan ı Danıl Kovalev «áskerı joǵary oqý ornyn úzdik bitirgeni úshin» tósbelgisimen marapattaldy. Olardyń esimderi ınstıtýttyń Qurmet taqtasynan oryn aldy.

Ofıtserlik pogondardy tapsyrý rásimine Soltústik Qazaqstan oblysy ákiminiń atynan onyń orynbasary Sátjan Ablalıev jáne QR Ulttyq ulan Bas qolbasshysynyń tárbıe jáne áleýmettik-quqyqtyq jumysy jónindegi orynbasary Álibek Seralıev qatysty. Al ata-analar Ulttyq ulannyń «Youtube» kanaly arqyly tikeleı efırden tamashalaýǵa múmkindik aldy.

1997 jyly negizi qalanǵan joǵary oqý ornyna Tuńǵysh Prezıdent N.Á.Nazarbaev Jaýyngerlik Týdy tapsyrdy. 24 jylǵy tarıhynda ınstıtýt 3746 jas ofıtserdi daıarlap shyǵardy, olardyń 260-y oqýdy úzdik bitirse, 45-i «áskerı joǵary oqý ornyn úzdik bitirgeni úshin» tósbelgisimen marapattaldy, olar Ulttyq ulannyń, QR UQK Shekara qyzmetiniń, Qorǵanys mınıstrliginiń, Memlekettik kúzet qyzmetiniń jáne basqa da áskerı qurylymdar bólimsheleriniń ofıtserler quramynyń qataryn tolyqtyrdy. Instıtýttyń alǵashqy túlekteri qazirdiń ózinde quramalar men áskerı bólimderdi basqarady, al olardyń keıbiri bas qolbasshylyqta jáne óńirlik áskerı qolbasshylyqtardyń shtabtarynda basshylyq laýazymdarda qyzmet etedi.

«Petropavl áskerı ınstıtýty tek Ulttyq ulan úshin ǵana emes, respýblıkanyń basqa da áskerleri men áskerı qurylymdary úshin ofıtser kadrlar daıarlaıdy. Elge myqty, kásibı daıarlyqtan ótken ásker kerek. Mundaı ásker bilikti, bilimdi áskerı kadrlardyń kómegimen jasaqtalady. Áskerı ónerdiń shyńyna jetý úshin dıplom alý jetkiliksiz. Únemi óz-ózińdi jetildirip otyrýyń qajet. Búginde áskerı ınstıtýt ózine artylǵan mindetti oıdaǵydaı oryndap otyr», - dedi QR Ulttyq ulan Bas qolbasshysynyń tárbıe jáne áleýmettik-quqyqtyq jumysy jónindegi orynbasary Álibek Seralıev.





Áskerı ınstıtýt jeti mamandyq boıynsha ofıtserler daıarlaıdy. Kýrsanttar segiz kafedrada oqytylady. Instıtýtta biliktilikti arttyrý fakýlteti jumys isteıdi, onda jyl saıyn Ulttyq ulannyń jáne ishki ister organdarynyń ofıtserleri men kelisimshart boıynsha áskerı qyzmetshileri mamandyqtary boıynsha qaıta daıarlaýdan ótedi.

Áskerı ınstıtýttyń jeke quramy Petropavl qalasy men Soltústik Qazaqstan oblysynyń qoǵamdyq-saıası, mádenı jáne sporttyq ómirine, óńirdiń qoǵamdyq tártibin qamtamasyz etýge belsendi qatysady.





Joǵary qaraı