Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Pedofıldi ustaý úshin 13-qabattan sekirgen almatylyq «Jyl polıtseıi» atandy

2021 jyldyń 23 maýsym 2021 10:15

ALMATY. QazAqparat – Almaty qalalyq polıtsııa departamentiniń Túrksib aýdandyq polıtsııa basqarmasynyń krımınaldyq bólim basshysynyń orynbasary Baqytjan Bákirov respýblıkalyq baıqaýda «Jyl polıtseıi» nomınatsııasynda jeńimpaz atandy. Pedofıldi ustaý úshin 13-qabattan sekirip ketken tártip saqshysy bul kúnde «qazaqstandyq Betmen» atanyp ketken. Baqytjan Bákirovtiń erligine kópshilik tánti boldy. QazAqparat tilshisi onyń ózinen oqıǵa qalaı bolǵany týraly áńgimelep berýin surady.

– Baqytjan, marapatyńyz qutty bolsyn!

– Rahmet. Oılamaǵan jerden taǵy da marapattaldym. «Jyl polıtseıi» ataǵy maǵan úlken jaýapkershilik júktedi. Sońǵy eki jylda kópshiliktiń qurmetine, alǵysyna bólenip jatyrmyn. Úlken rahmet! Týǵan elime, jerime, Qazaqstan polıtsııasyna ári qaraı da adal qyzmet etýge ýáde beremin. Halqymynyń yqylasynan artyq alǵys joq eken, sony túsindim.

– Qaı óńirde dúnıege keldińiz?

– Men 1983 jyly 17 shilde kúni Ońtústik Qazaqstan oblysynyń Jetisaı qalasynda dúnıege keldim. Otbasyndaǵy úsh balanyń úlkenimin. Ózimnen keıin qaryndasym jáne inim bar. Ákem Anýarbek Bákirov maqta zaýytynda ınjener bolyp jumys isteıdi. Anam úı sharýasyndaǵy kisi.

– Bul mamandyqty tańdaýǵa ne túrtki boldy?

– Kishkentaı kezimnen qylmyskerlermen kúresýdi armandaıtynmyn. Oǵan birden-bir sebep - fılmder. Sol kezde polıtseılerdiń, tergeýshilerdiń jumysy týraly kınolardy jıi kórsetetin. Sony tapjylmaı otyryp kóretin edim. Bálkim sol túrtki bolǵan shyǵar. Óse kele polıtsııa mamandyǵyna degen qyzyǵýshylyǵym arta tústi. Sóıtip arman qýyp Almatyǵa keldim.

– Ózińiz armandaǵan oqý ornyna túse aldyńyz ba?

– Iá. Almatydaǵy Abaı atyndaǵy memlekettik ýnıversıtetiniń zań fakýltetine oqýǵa tústim. Grantqa ilige almadym. Aqyly bóliminde bilim aldym. 2000 jyly túsip, 2005 jyly támamdadym. Oqýymdy bitirgen soń bir jyldaı óz mamandyǵym boıynsha jumys taba almadym. Qurylysta istedim.

2006 jyly elordada polıtsııa qyzmetkerlerine baıqaý jarııalanǵanyn estip, baǵymdy synap kórgim keldi.

Nur-Sultanǵa kelip sol baıqaýǵa qujat tapsyryp, baǵyma qaraı ІІM akademııasynyń alǵashqy daıarlyq oqýyn 3 aı oqydym. Osy ýaqyt aralyǵynda biraz tájirıbe jınaqtadym.

– Eńbek jolyńyzdy qaı mekemede bastadyńyz?

– 2006 jyly Almaty qalasy polıtsııa departamenti krımınaldyq polıtsııa basqarmasynyń jedel ýákili qyzmetine ornalastym. Eńbek jolym osy jerde bastaldy. 15 jyl boldy osyndamyn. Byltyrdan beri Túrksib aýdandyq polıtsııa basqarmasynyń krımınaldyq bólim basshysynyń orynbasary qyzmetine taǵaıyndaldym.




– Ómirińizdi qaterge tigip, asa qaýipti qylmyskerdi ustaý úshin 13-shi qabattan sekirgende boıyńyzdy eshqandaı qorqynysh bılemedi me?

– Ol kezde men óz ómirimdi oılamadym. Maqsatym– qylmyskerden aıyrylyp qalmaý, buıryqty buljytpaı oryndaý boldy. Bizge 11 shildede kúni belgisiz adamnyń Almatynyń Túrksib aýdanyna qarasty aýmaqta úı tonap, 15 jasar qyzdy zorlap ketkeni týraly habar kelip tústi. Jedel ýákilderden eki top quryldy. Sonyń ishinde men de barmyn.

– Kúdiktini neshe kúnde qolǵa túsirdińizder?

– Kúdiktini tórt kún izdestirdik. Keıin onyń páter jaldap, tyǵylyp jatqanyn anyqtadyq. Birden ony ustaý josparyna kiristik. Men jáne áriptesim jaldanǵan páter ıesimen birge 13-shi qabatqa kóterildik. Qylmyskerdi ustaý úshin santehnıktiń kıimin kıip aldyq. Onyń qosalqy kilti boldy.

Áıel ony shaqyryp, qubyrdan sý aǵyp jatqanyn aıtty. «Ony jóndeýge santehnıkter keldi» dedi. Ol dálizge shyqty, men oǵan qaraı umtyldym. Ol bólmeniń birine qashyp kirip, ashyq turǵan terezeden sekirip ketti. Bul sekýndta ádette eshteńe oılamaısyń, eń bastysy - qýyp jetý. Sondyqtan men onyń artynan sekirdim.

11-qabatta terassa bar, sol jerge quladyq. Qulaǵan kezde aıaǵymnyń synǵanyn birden sezdim. Sebebi «syrt» etken dybys shyqty. Qylmysker qashý áreketin jalǵastyrmaq boldy. Bar kúsh-jigerimdi salyp, ony ýystan shyǵarmaýǵa tyrystym.

Seriktesim kelgenshe kúttim. Ekinshi top úıdi qorshap turǵan edi. Olar ústine kóterilip kelgenshe pedofıldi jibermeı otyrdyq.

– Qazir densaýlyǵyńyz qalaı?

– Sol aıaǵyma úsh ret operatsııa jasaldy. Qazir tolyq jazyldym. Densaýlyǵyma shaǵymdanbaımyn. Jumysyma oraldym.

– Erligińiz elenip, QR Prezıdentiniń Jarlyǵymen ІІ dárejeli «Aıbyn» ordenimen marapattaldyńyz. Sol sátte qandaı sezimde boldyńyz?

– «Aıbyn» ordenin alǵan kezde keremet sezimde boldym. Kez kelgen adam madaq-marapatqa usynylsa qýanyshqa keneledi ǵoı. Men de qatty qýandym. Sondaı-aq, bul marapat maǵan úlken jaýapkershilik júktedi.

– Polıtseı ataný úshin adamnyń boıynda qandaı qasıetter bolýy kerek dep oılaısyz?

– Eń aldymen, tózimdi jáne antqa adal bolý kerek. Qyzmetke ornalasqanda biz ant qabyldaımyz. Onda azamattardy qorǵaý - bizdiń jumysymyz ekeni kórsetilgen. Ár er azamattyń boıynda jiger, namys bolady. Elimiz ben halqymyzdyń tynyshtyǵy úshin eńbek etýimiz kerek. Eń úlken úlken mártebe osy dep oılaımyn.

– Ózińizdiń otbasyńyz jaıynda aıtyp ótseńiz?

– Kópbalaly ákemin. Jarym Maqpal ekeýmiz 6 bala tárbılep otyrmyz. 4 ul, eki qyzym bar. Úlkeni - 11 jasta, kishkentaıymyz - birde.

– Suhbatyńyzǵa rahmet!


Avtor Alma Muqanova
Basty sózder: Zań, Qoǵam, Almaty, Qylmyspen kúres,
Joǵary qaraı