Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Pavlodarda jylýmen jabdyqtaýdy turaqtandyrý josparyna jurtshylyqtyń usynysy engiziledi

2021 jyldyń 12 qańtar 2021 01:32

PAVLODAR. QazAqparat - Pavlodarda jylytý maýsymynyń problemalary boıynsha qoǵamdyq komıssııa qurylyp, oǵan qalanyń burynǵy basshylary, tájirıbeli jylý berýshiler, sarapshylar, páter ıeleri kooperatıvteriniń tóraǵalary jáne depýtattar kirdi, dep habarlaıdy QazAqparat oblys ákimdigine silteme jasap.

Komıssııanyń alǵashqy keńesi oblys ákimdiginde óńir basshysynyń tóraǵalyǵymen ótti. Ábilqaıyr Sqaqov qoǵam belsendileri men táýelsiz sarapshylardyń Pavlodardyń kóp qabatty úılerin jylýmen qamtamasyz etýdi jaqsartý jumystaryna qatysý qajettigin atap ótti.

«Jaqynda bolǵan apattar tizbegi qala turǵyndaryn jylýsyz qaldyrdy. Shuǵyl sharalar qabyldaýǵa týra keldi, zaqymdanýdy tez arada oqshaýlaı aldyq, biraq qatty aıaz jáne epıdemıologııalyq jaǵdaıda oryn alǵan oqıǵalar kóptegen suraqtar týǵyzyp otyr. Bizge sonymen qatar jaǵdaıdy jaqsartý boıynsha óz usynystaryn engizetin táýelsiz qoǵamdyq komıssııa qajet», - dep eske saldy oblys ákimi.

Pavlodar qalasynyń ákimi Erjan Imanislám habarlaýynsha, jylý berý maýsymy bastalǵannan beri qalanyń jylý jelilerinde 14 apat tirkelgen. Biryńǵaı baılanys ortalyǵyna jylýmen qamtý máseleleri boıynsha telefon arqyly 1 600-den astam ótinish, áleýmettik jeli arqyly 1 300-den astam ótinish kelip tústi. Jalpy alǵanda Pavlodarda júıeli túrde jylý berý jaǵynan irkilis oryn alatyn 149 úı anyqtaldy.

Óńirlik kásipkerler palatasynyń dırektory, jylý jelileriniń burynǵy dırektory Oleg Krýk turǵyn úıler men áleýmettik nysandardy jobalaý kezindegi kemshilikterge toqtaldy. Onyń pikirinshe, iri qurylysty josparlaý kezinde jańa qurylys paıdalanýǵa berilgennen keıin qoldanystaǵy ınfraqurylymǵa túsetin júktemeni egjeı-tegjeıli esepteý qajet. Birinshi kezekte bolashaqta jańa tutynýshylar qosylatyn magıstraldardyń ýchaskelerin jóndeý úshin jylý jelilerin qaıta jańartýdy jobalaý kezinde osyndaı tásil usynylyp otyr.

«Turǵyn úı qoryna jáne úı ishinde jylýmen jabdyqtaý qalaı júretinine nazar aýdarǵym keledi. Meniń jylý jelileriniń basshysy bolǵan kezimde úlken apat bolǵanda, biz bes qabatty úıde qatyp qalǵan tik qubyrdy kesip tastaǵan bolatynbyz. Olar tolyǵymen bitelip qalǵan boldy. Biz tek páterdegi sý qubyryn aýystyratynymyzdy moıyndaıyq, alaıda jylý qubyrlary aýystyryla qoımaıdy, al olar lastanyp bitelip qala beredi», - dedi tolyqtyrdy Oleg Krýk.

Jylý energetıkasy salasyndaǵy sarapshy Alekseı Safarbakov kvartal ishindegi jylý jelisiniń jaı-kúıi nashar ekenin atap ótti. Onyń pikirinshe, qatty aıaz kezinde jylý tasymaldaǵyshtyń temperatýrasyn kóterý barlyq aýdandardaǵy qubyrlarǵa keri áser etedi. Sondyqtan qoǵamdyq komıssııa múshesi kvartalishilik jelilerdi jańartý boıynsha jospardy múmkindiginshe tezirek ázirleýdi usyndy.

«Búginde gıdravlıkalyq rejımniń jáne jylý jelileriniń jumysyn ózdiginshe ózgertip tastaıtyn tutynýshylarǵa yqpal ete almaı otyrmyz. Ortalyqtandyrylǵan júıe bolǵandyqtan, bir tutynýshynyń jylý parametrin ózgertýi ekinshisine áser etetinin túsiný kerek. Eger bizde shamadan tys jylytylatyn úıler bar bolsa, sáıkesinshe jylýy jetkiliksiz úıler de bolady. Qalanyń keıbir úılerinde nemese bıznes sýbektilerinde temperatýra normatıvtik kesteden 10-15 gradýsqa joǵary, biraq olardyń jylý toraptaryna kirý múmkin emes. Sondyqtan shamadan artyq jylý tirkelgen jylý núktelerine kim kire alatyndyǵyn qamtamasyz etetin normatıvtik baza bolýy kerek», - dep atap ótti Alekseı Safarbakov.

Kezdesý barysynda keıbir PIK-terdiń tártip buzýshylyǵy da talqylandy.

«Jaqynda magıstralda apat bolǵan kezde jáne jylýmen qamtamasyz etilmegen úıler basqa stansalarǵa aýystyrylǵanda, keıbir PIK-ter shúmekterdi ishki jylý júıelerine tastap, júıeniń jumysyn buzdy. Úılerdi jylytý maýsymyna qabyldaý kezinde bul shúmekter eshqandaı jaǵdaıda alynbaıtyn etip mórlenýi kerek. Jylý sorǵylaryn ornatý jylý júıesine de áser etedi. Bireý osyndaı sorǵyny qosady, al kórshi úı qajetti jylýsyz qalady, sodan keıin bárin qalpyna keltirý óte qıyn. Bul máselede qatań tártip bolýy kerek», - dedi Pavlodar oblysynyń qurmetti turǵyny Aleksandr Rıýmkın.

Eske sala ketsek, 2020 jyly 27 qarasha Pavlodardyń ońtústik jylý jelisinde apat bolǵannan keıin osy aýdanda ornalasqan 440 turǵyn úı birden úshinshi jylý elektr ortalyǵyna qosylǵan bolatyn.

Oqıǵa sebepterin anyqtaý úshin energetıkalyq qadaǵalaý, tótenshe jaǵdaılar jáne basqa da organdar jumyldyryldy. Al oblys ákimi Pavlodardyń jylý ortalyǵyndaǵy apatty tekserýge táýelsiz sarapshylar tartýdy usynǵan edi.


Joǵary qaraı