Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Pavlodar oblysynda kıikterdi aýlaýǵa tyıym salynady

2021 jyldyń 30 qarasha 2021 14:47

PAVLODAR. QazAqparat - Pavlodar oblysynda jeltoqsan aıynda kıikterdi aýlaýǵa tyıym salynady. Aqbókenderdi aýlaý, múıizin alý, etin satý sııaqty zańsyz áreketterge 1-4 mln teńge aralyǵynda aıyppul salynady, dep habarlaıdy QazAqparat Pavlodarnews.kz saıtyna silteme jasap.

Bul týraly onlaın ótken baspasóz jıynynda Pavlodar oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Rýslan Tólepbaev málim etti.
- 2021 jylǵy 1 jeltoqsannan búkil Qazaqstan boıynsha «Aqbóken» aktsııasynyń ekinshi kezeńi bastalady. Aktsııanyń maqsaty – kıikter sanynyń popýlıatsııasyn saqtaý, brakonerlikpen kúres jáne kıikterdi, olardyń múıizderin jáne basqa da derıvattaryn zańsyz óndirýmen, ótkizýmen jáne satyp alýmen aınalysatyn brakonerlik toptardyń qyzmetin anyqtaý jáne jolyn kesý boıynsha jumysty kúsheıtý, - dedi Rýslan Tólepbaev.

Qylmystyq kodekste paıdalanýǵa tyıym salynǵan janýarlardy, olardyń bólikterin nemese derıvattaryn zańsyz aýlaý, satyp alý, saqtaý, ótkizý, ákelý, áketý, jiberý, tasymaldaý nemese joıýǵa qatysty jaza kózdelgen. Aqbókenderdi zańsyz aýlaýǵa qatysy atalyǵyna – 500 AEK (1 458,5 myń teńge), analyǵyna, tóline - 350 AEK (972,3 myń teńge) aıyppul salynady.
- Al, erekshe qorǵalatyn tabıǵı aýmaqta aqbókenderdi zańsyz aýlaǵany, sondaı-aq janýarlardyń sırek kezdesetin, quryp ketý qaýpi tóngen túrleriniń tizbesine, ıaǵnı Qyzyl kitapqa engizilgen janýarlardy joıǵany úshin aıyppul 3 ese ulǵaıady. 1050-den 1500 AEK kóleminde, ıaǵnı 3-4,4 mıllıon teńgege deıin jetedi, - dedi Rýslan Tólepbaev.

Jalpy, janýarlardyń sırek kezdesetin jáne quryp ketý qaýpi tóngen túrlerine, paıdalanýǵa tyıym salynǵan janýarlarǵa qatysty zańsyz ań aýlaý múlki tárkilenip, 6000 AEK-ke deıingi mólsherde aıyppul salynady nemese sol mólsherde túzeý jumystaryna, ne 3 jyldan 10 jylǵa deıingi merzimge bas bostandyǵy shekteledi.
Inspektsııa basshysynyń aıtýynsha, qazir Qazaqstan boıynsha kıikterdiń sany ósýde.
- 5-6 jyl buryn Pavlodar oblysynda bir topta 10-15 bas kıik júrse, qazir 1,5-2 myńǵa deıin jetedi. Búginde obylsta barlyǵy 8-10 myń bas kıik bar. Oblysymyzda kıikterge qatysty sońǵy 6-7 jylda zań buzýshylyq tirkelgen joq, - dedi Rýslan Tólepbaev.

Kıikterdi, aýlaýǵa tyıym salynǵan janýarlardyń etin satý, aýlaý jáne t.b zańsyz áreketter anyqtalsa 87053842131, 607201 nemese 102 nómirlerine habarlasý kerek.
Aıta keteıik, «Aqbóken» aktsııasy eki kezeńde ótedi: kóktemgi tóldeý kezeńinde 15 sáýirden 15 mamyrǵa deıin jáne qysqy kezeńde 2021 jylǵy 1-31 jeltoqsan aralyǵynda.


Joǵary qaraı