Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Pavlodar oblysy Nur-Sultandaǵy jármeńkege 550 tonna ónim ákeldi

2021 jyldyń 9 qazan 2021 11:49

NUR-SULTAN. QazAqparat - Elordada aýyl sharýashylyǵy jármeńkesi ótip jatyr. Osy demalys kúnderi «Han Shatyr» SOO janyndaǵy alańda Pavlodar oblysy 550 tonna óz ónimin usyndy. Mundaǵy baǵa naryq qunynan 10-15%-ǵa tómen, dep habarlaıdy QazAqparat qala ákimdiginiń resmı saıtyna silteme jasap.

Pavlodar oblysy ylǵı da kókónisimen, etimen tanymal bolǵan. Elorda turǵyndaryna qajetti azyq-túlik osy demalys kúnderi tańǵy 9-dan 18:00-ge deıin satylady.

«Biz 550 tonna aýyl sharýashylyǵy ónimderin ákeldik. Negizinen bul kartop, sábiz, et jáne t.b», – dedi Pavlodar oblysy Aýyl sharýashylyǵy basqarmasynyń basshysy Nurbolat Maqashev.

«Biz jármeńke týraly san márte estidik. Biraq baratyn múmkindigimiz bolmady. Al búgin ýaqyt taýyp kelip otyrmyz. Jármeńkeniń apta saıyn ótetini jaqsy», – deıdi elorda turǵyny Ásemgúl.

Pavlodar oblysy taýar ákelip qana qoımaı, qazaq dalasynda tanymal bolǵan jármeńkeler jaıly tarıhtan syr shertti. Arnaıy stend uıymdastyryldy, onda talantty ónerpazdar óz ónerin ortaǵa saldy, kúmbirlegen kúı oryndalyp, jármeńkelerdiń dástúri men tarıhy týraly aıtyldy.




«Pavlodar kartobymen tanymal. Assortımenttiń úlken toby – kókónister. Sondaı-aq, oblys bakaleıa, et-sút ónimderin ákeldi. Jármeńke barysynda 3 myń tonnaǵa jýyq ónim satyldy. Respýblıkanyń barlyq óńirinen 420-dan astam kásipker qatysty», – dedi Nur-Sultan qalasy Kásipkerlik basqarmasynyń basshysy Rýslan Ydyrysov.

Mundaı jármeńkeler qala turǵyndary úshin taýarlardy qolaıly baǵamen satyp alýǵa múmkindik beredi.

Jármeńkede sanıtarlyq normalar tolyqtaı saqtalǵan. Yńǵaıly bolý úshin munda qozǵalys baǵyty da kórsetilgen, áleýmettik qashyqtyqty saqtaýǵa arnalǵan belgiler de joq emes, al týrnıketterde qol gıgıenasyna arnalǵan sanıtaızerler ornatylǵan. Sondaı-aq, kelýshilerge karantındik sharalardy, onyń ishinde maska rejımin saqtaýdy eske salatyn bannerler bar.

Elordada bıyl áleýmettik mańyzy bar azyq-túlik ónimderiniń baǵasyn turaqtandyrý úshin kókónister men jemisterdiń pisý ýaqytyna saı 14 jármeńke ótkizý josparlanǵan. Aýyl sharýashylyǵy óńirlik jármeńkeleriniń maýsymy Nur-Sultanda 31 qazanǵa deıin jalǵasady.

21 tamyzdan bastap elordadaǵy jármeńkelerde Túrkistan, Batys Qazaqstan, Shyǵys Qazaqstan, Qyzylorda, Almaty, Atyraý, Mańǵystaý, Jambyl, Aqtóbe jáne Qaraǵandy oblystarynyń aýylsharýashylyq taýar óndirýshileri óz ónimderin usyndy.




















Joǵary qaraı