Aýa raıy
Astana -23 °S
Almaty -8 °S
valıýta baǵamy
USD 421.58
EUR 496.83
RUB 5.53
CNY 62.20

Parlament zeınetaqy jınaǵynyń bir bóligin alǵan kezde tabys salyǵyna qatysty túzetýlerdi qabyldady

2020 jyldyń 24 qarasha 2020 12:25

NUR-SULTAN. QazAqparat – Parlament azamattar zeınetaqy jınaǵyndaǵy qarjynyń bir bóligin alǵan kezde bir rettik tabys salyǵyn birden tólemeýge múmkindik beretin qujatty qabyldady, dep habarlaıdy QazAqparat tilshisi.

Búgin Parlament Májilisiniń jalpy otyrysynda palata depýtattary «Salyq jáne bıýdjetke tólenetin basqa da mindetti tólemder týraly» Kodekske jáne «Salyq jáne bıýdjetke tólenetin basqa da mindetti tólemder týraly» Kodeksin qoldanysqa engizý týraly» Zańǵa ózgerister men tolyqtyrýlar engizý týraly» zań jobasyna Senat engizgen tolyqtyrýlarmen kelisti.

QR Parlamentiniń Senaty 46 túzetý engizdi. Bul rette túzetýler Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda aıtylǵan negizgi sharalardy iske asyrýǵa baılanysty.

Onda:

- Qazaqstan Respýblıkasynyń zeınetaqymen qamsyzdandyrý týraly zańnamasyna sáıkes birjolǵy zeınetaqy tólemderin paıdalanǵan kezde jeke tulǵalarǵa jeke tabys salyǵyn tóleý merzimin keıinge qaldyrý quqyǵyn berý, sondaı-aq ony esepteý, ustap qalý jáne tóleý tártibin aıqyndaý;

- pandemııadan neǵurlym kóp zardap shekken sektorlarda jumys isteıtin shaǵyn jáne orta bıznes sýbektilerine aınalymnan bólshek saýda salyǵyn tóleý quqyǵyn berý maqsatynda bólshek saýda salyǵynyń arnaıy salyq rejımin engizý;

- Úkimet aıqyndap qoıǵan qyzmet túrleriniń tizbesi boıynsha ekonomıkanyń neǵurlym kóp zardap shekken salalaryndaǵy mıkro, shaǵyn jáne orta bıznes sýbektilerine bıýdjetke tólenýi tıis áleýmettik salyq somasyn eseptelgen áleýmettik salyq pen áleýmettik aýdarymdar somasy arasyndaǵy aıyrma retinde aıqyndaý quqyǵyn aǵymdaǵy jyldyń sońyna deıin berý.

«Senat engizgen túzetiler Májilis maquldaǵan zań jobasynyń tujyrymdamasyn ózgertpeıdi jáne mazmunyn nasharlatpaıdy.

Osy aıtylǵandardy eskere otyryp, Qarjy jáne bıýdjet komıteti «Salyq jáne bıýdjetke tólenetin basqa da mindetti tólemder týraly» Kodeksine jáne «Salyq jáne bıýdjetke tólenetin basqa da mindetti tólemder týraly» Kodeksin qoldanysqa engizý týraly» QR Zańyna ózgerister men tolyqtyrýlar engizý týraly» zań jobasyna Senat engizgen ózgeristermen jáne tolyqtyrýlarmen kelisýdi usynady», - dedi Májilis depýtaty Sergeı Sımonov.

Eske sala keteıik, buǵan deıin Memleket basshysy Qasym-Jomart Toqaev 2021 jyldan bastap azamattarǵa zeınetaqy jınaǵynyń bir bóligin paıdalanýǵa múmkindik berý jóninde tıisti memlekettik organdarǵa tapsyrma bergen edi. Alaıda bul qarajat úshin tabys salyǵyn tóleý qajet. Dál osy másele qoǵamda narazylyq týdyrdy. Sondyqtan senatorlar bul tólemdi keıinge shegerýdi jáne birneshe jylǵa bólip tóleýdi usyndy. ıAǵnı, zeınetaqy jınaǵyndaǵy qarjyny kelesi jyldan bastap alýǵa bolady.

«Zeınetaqy jınaǵyndaǵy qarjynyń bir bóligin aldyn ala alǵan kezde onyń 10 paıyzyn bir rettik salyq retinde tóleý kerek. Ony qazirgideı kúrdeli kezeńde azamattar úshin tıimsiz dep esepteımiz. Sondyqtan atalǵan salyqty zeınetaqy jınaǵyn alǵan kezde emes, tek zeınetke shyqqan soń ǵana tóleý usynylyp otyr. Onyń ózinde, bárin birden aýdarmaı, zań jobasyna 16 jyldyń ishinde bólip tóleý týraly norma engizildi», – dedi Senat tóraǵasy Máýlen Áshimbaev.



Joǵary qaraı