Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Pandemııada alaıaqtar men qarjy pıramıdalary qazaqstandyqtardy 417 mlrd teńgege aldaǵan

2021 jyldyń 19 qazan 2021 17:07

NUR-SULTAN. QazAqparat – Pandemııa órshigen tusta alaıaqtar men qarjy pıramıdalary qazaqstandyqtardan 417 mlrd teńge aldap alǵan. QR Bas prokýrory Ǵızat Nurdáýletov Májilis ókilderiniń depýtattyq saýalyna bergen jaýabynda osy tendentsııamen kúres qalaı júrip jatqanyn baıandady, dep habarlaıdy QazAqparat tilshisi.

Quqyqtyq statıstıka jáne arnaıy esepke alý jónindegi komıtettiń deregi boıynsha, 2020 jylǵy naýryz ben 2021 jylǵy sáýir aralyǵynda «alaıaqtyq» jáne «qarjy pıramıdasyn qurý jáne oǵan basshylyq etý» baptarymen qatysy bar 41 307 quqyq buzýshylyq tirkelgen. Osy ister boıynsha zardap shekkenderdiń jalpy sany 40 833 adamǵa jetken. Al kelgen zalaldyń mólsheri 417 mıllıard teńge bolǵan.

Bir top Májilis ókiliniń QR Bas prokýrory Ǵızat Nurdáýletovke joldaǵan depýtattyq saýalynda osyndaı problema kóterilgen.

Bas prokýror saýalǵa bergen jaýabynda bul ispen qazir Qarjy naryǵyn retteý jáne damytý agenttiginiń janynan qurylǵan arnaıy komıssııa aınalysatynyn aıtady.

«Qarjy pıramıdalaryn anyqtaý jáne jolyn kesý, materıaldaryn quqyq qorǵaý organdaryna berý úshin Bas prokýratýranyń bastamasymen Qarjy naryǵyn retteý jáne damytý agenttigi janynan (Ulttyq bank, AFM, Qarjymıni, AQDM, ІІM-men birlesip) vedomstvoaralyq jumys toby quryldy», - dep jazdy Ǵızat Nurdáýletov depýtattyq saýalǵa jaýabynda.

Onyń aıtýy boıynsha, vedomstvoaralyq jumys tobynyń aıasynda memlekettik organdar arasyndaǵy ózara is-qımyl jáne qarjylyq pıramıda belgileri bar uıymdardyń qyzmetin toqtata turý sharalardy qabyldaý tetigi ázirlengen.

Sondaı-aq, ınternet-resýrstar buǵattalyp, BAQ-ta túsindirý jumystary júrgizilip keledi.

«Bul jumystar 12 qarjy pıramıdasyn erte bastan anyqtap, birden qyzmetin toqtatýǵa múmkindik berdi. Atalǵan nysan ıeleriniń ústinen sotqa deıingi tergeý bastaldy. Qarjy pıramıdalaryna jáne zańsyz qarjy operatsııalaryna qarsy is-qımyl jónindegi jumys turaqty baqylaýda. Bas prokýratýra osy saýaldy nazarǵa ala otyryp, zańdylyqty nyǵaıtý jáne azamattardyń quqyqtaryn qorǵaýdy kúsheıtý boıynsha odan ári birlesken jumysqa daıyn», - dep túıindedi bas prokýror.


Joǵary qaraı