Aýa raıy
Astana 9 °S
Almaty 16 °S
valıýta baǵamy
USD 412.55
EUR 468.66
RUB 5.79
CNY 58.80

Ózbekstanda karantın qaıta kúsheıtildi

2020 jyldyń 9 shilde 2020 16:00

TAShKENT. QazAqparat – 10 shildeden bastap Ózbekstanda karantın sharasy qaıta kúsheıtildi, dep habarlaıdy QazAqparat menshikti tilshisi.

Koronavırýsqa qarsy kúres jónindegi arnaıy komıssııanyń sheshimimen Ózbekstanda 10 shildeden 1 tamyzǵa deıin avtokólikter qozǵalysyna shekteý qoıylady. Uıym qyzmetkerleri qashyqtan jumys isteýge kóshedi. Budan bólek, toı ótkizýge, jappaı jáne dinı sharalar uıymdastyrýǵa tyıym salynyp, bazarlar, tamaqtaný oryndary, sport zaldar men shıpajaılar jabylady. 65 jastan asqan adamdarǵa qoǵamdyq oryndarda úsh adamnan artyq toptasyp júrýge tyıym salynady.

Sonymen qatar, saıabaqtardaǵy attraktsıondar, mektepke deıingi bilim berý mekemeleri, kıim-keshek satatyn bazarlar men azyq-túlik satpaıtyn iri dúkender, jattyǵý zaldary men basseınder, oqý kýrstary, úıge deıin jetkizý qyzmeti bar tamaqtaný oryndaryn qospaǵanda, meıramhanalar, dámhanalar, ashanalar, sháıhanalar, shıpajaı, pansıonattar, balalar lagerleri, jaǵajaılar qyzmetterin toqtatady.

Halyqaralyq áýe reısteriniń sany eki ese qysqarady. Halyqaralyq júk tasymalymen aınalysatyn júrgizýshiler koronavırýsqa test tapsyrýǵa mindetteledi.

El prezıdenti vıdeoselektorlyq jınalysta aýmaqtardy «jasyl», «sary» jáne «qyzyl» aımaqqa bólý jumystary tolyqqandy júrgizilmeı jatqanyn málim etti. Ózbekstan prezıdentiniń aıtýynsha, shildeniń birinshi aptasynda aýrý juqtyrǵandar 2 167 adamǵa artqan. Sonyń ishinde 1 267 adam (58%) turǵyndar arasynan anyqtalǵan.

Ózbekstan Respýblıkasy Densaýlyq saqtaý mınıstrliginiń málimetinshe, Ózbekstanda koronavırýsqa shaldyqqandar sany 11 259 adamǵa jetken. Elde koronavırýstan emdelip shyqqandar sany – 7 060 adam. 4 152 naýqas em qabyldap jatsa, sonyń ishinde 31-i – aýyr halde jáne 12-si – asa aýyr halde. 47 adam osy indetten qaıtys bolǵan.


Avtory: Mıras Qýandyqov


Basty sózder: Koronavırýs, Ózbekstan,
Joǵary qaraı